In quissa circustanza
Hè vera o caru sgiò,
Ma hè fatta cussì a vita
E spiegalla ùn si pò,
Avà a noscia cultura
Hè tramutata in altrò !!

Hè tramutata in altrò
E nostre primure sò cotte
Serà in l'Acapulcò
O puru à la via Notte
Di a nostra ghjuventù
Sò cambiate le virtù !!!

Hè vera cio chi tù dici
Hè cascata à l'eternu,
Tutti i nosci puntelli
So andati à caternu,
Avà i nosci esempii
Un ne so più choi scempii !!!

Avà vecu chè inciampi
Eppo sfiata la to musa
Certi versi chè tù lampi
A to mente hè cunfusa?
Serà colpa o amicu
Di quella chì ti ricusa ?

Hà fattu un'affaccatella
L'affaccata di u ghjattu
Acqua micca in la scudella
Nè "crucchette" ind'è u piattu
Miaulendu à 'ssa più bella
Hè partutu ciattu ciattu

O tanti addii sò da fà
Dopu à lu pasturellu
Serà Mattei à andà
U foru hè urfanellu
L'acelletti à cantà
Stanu in lu so nidarellu

Pastureddu hè smaritu
Dopu à questa bella fiera
Tutto'ognunu s'era arvistu
Chì ùn hè più ciò ch'ellu era
Avà pare chì l'amicu
Sia sempre in vogulera...

Serà spenta a so fiara
A so musa hè mischina
A so rima era amara
In sta bella siratina
Avà sona di ghitarra
O puru di mandulina...

Avà s'ellu si stà mutu
S'ellu manca di curagiu
Cù u versu risulutu
Ciò ch'o pensu diceraghju
Pastureddu hè partutu
E allora? Bon viaghju !!!

Avà vicu camarati
Chì mi fate un lamentu,
Ùn siate addulurati
U mè cantu ùn hè spentu,
Ma i tempi sò campiati
E aghju un altru stentu.

Avà marchju spinsiratu
I fatti ne sò palesi,
Chì mi socu tramutatu
Versu più alti paesi,
Duva mi trovu à latu
Di i musi curtinesi.

Avà amicacci cari
Palisaraghju u fattu,
Quissi ùn sò rimi amari
Ma dumandu un riscattu,
Aghju scrittu issi filari
Avà caccieti u RITRATTU !!!!!!!!!

Hè vera à prima vista
Sò statu assai cumossu
Videndu a to facciaccia
Nant'à u nostru Foru Corsu
Ma s'è tu voli ch'a cacci
Ci vole à fà di più sforzu

Mi si pari caru sgiò
Chì i patti ùn rispetti,
Matteu avia rasgiò
I to parolli ùn sò schietti,
Di più amicu ùn si pò
Cacciami quissi spichjetti !!!!!!

Vicu chì cù l'amicacci
Di macagnami ti piaci,
Ti ridi di certi facci
Solu par què sè capaci,
Ma se u ritrattu ùn cacci
Cù mè ùn truvarè paci.

Ascolta incù primura
La mè rima bedda sciolta,
Sè ùn voli avè paura
E campà a vita rivolta,
Cacciami quissa fiura
A dicu pà l'ultima volta !!!!!

Eiu ùn cercu micca a pace
Aghju una sola primura
Ancu s'è a tè dispiace
E a to rima torna scura
Ciò ch'o vogliu o amicu
Hè di leghje a to scrittura