Caru maestru volti tù
À mè mi face u piacè !!!!
Cuntinuemu à cuntrastà
Cum'è nanzu trà mè è tè
Ma perchè ùn ai più rispostu
Era tù ammusciatu o chè ?

Un era micca ammusciatu
E ti dò a spiecazione
Un pudia datti fiatu
Ch'era ghjunta a cunfusione
Chì era accatastatu
Da un bellu travaglione!

Avà ci vole à truvà ci
À cuntrastà à pettu à pettu
Quandu dui sò à impruvisà
Eo sempre ascoltu è aspettu
À mè mi piace a paghjella
Forse serà u mo difettu

Un si parla di difettu
A voglia ùn hè puvarella
Sò prontu per ogni sughjettu
L'impruvisata o a paghjella
Ci truveremu in direttu
A strappacci musa è canella!

Ma a mo voce ùn s'usa
Statine puru tranquilu
E in quantu à a mo musa
Mi seguita qunadu sguilu
Nisuna ùn serà cunfusa
Teneraghju u mo filu!

Cantadori cum'è tù è eo
L'averaghju visti ùn sò quantu
Trova ci ne puru un terzu
À a paghjella li deremu u vantu
A ci feremu tutti à trè
Seria un piacè tamantu

U piacè serà tamantu
Un ai mancu u toltu
Femu in trè quellu cantu
Postu chì tutt(u) hè discioltu
E dopu di ogni vantu
Ne feremu u nostru accoltu!

Dimmi quandu ci scuntremu
Per mè a messa hè detta
Truvemu ci duv'è tù voli
Affaccu cù a mo vitturetta
L'aghju compra dui anni fà
Viaghja cum'è a saetta

A feremu di sicura
Passeremu una stundetta
Appronta a to vittura
Ma senza quella saetta
Un appii tanta primura
Tempu vene à chì l'aspetta

Sicura chì e nostre strade
Ne vedenu filà vitture
Ma prima à quesse custì
Funu e mule bè mature
Avà strada hè pista di corsa
Chì porta tante sciagure

Hè vera : troppu sciagure
Viteeza è accidenti
Ci arriganu e bughjure
Eppo dinù tanti pienti
Piantemu ste cose scure
Ci hè disgià troppu lamenti...