Eu ùn cunnoscu Alagna
E a Spagna mancu appena
Sì bonu per a macagna
Ma ùn sì ancu in scena
Ne serai a mo cumpagna
Quella Segara Elena...

* cantavanu inseme ma ùn ci n'era chè unu chì cantava bè...

Ùn hè mai statu in pena
Mai chè mai u meiu u cerbellu
Sempre cercu à struiscemi
Dapoi ch'o sò zitellu
Ti ripetu : Ti possu amparà !
Ma forse sì ciuncarellu...

Eiu ùn sò ciuncarellu
Ti sbagli ma si perdona
Maneghju u riturnellu
Sia paghjell' o canzona
A ti dicu sò mudellu
E aghju l'arechja bona!

S'è tù ai l'arechja bona
I to tempi ùn seranu persi
Sterei mutu à cantu à mè
Mancu altri seranu spapersi
Tutti adduniti in giru à mè
Senterete i mo versi

Sinteremu i to versi
S'ella hè a to vuluntà
Siconde, bassi è terzi
Simu pronti à ascultà
Ma s'elli crescenu merzi
Ti faremu ancu piantà!

E seguitu veramente
Forse ai capitu male
E ne sò sò bellu presente
Per cantà tradiziunale
A ripetu è stà à sente :
A mio voce hè principale!!

A sapè ciò ch'ellu vale
Un ci serà cunfusione
A mo voce hè speciale
Hè voce di campione
Un truverai l'uguale
Chì vale più d'un milione!

Poi parlà di cerbellu
Incù tantu galateu
Sè u to versu hè ribellu
Un ti possu dì megliu
Ma sappia chì u mudellu
In stu casu hè u meu!

A più bella voce l'ai tù
U to cerbellu hè mudellu
À sente ciò ch'è tù dici
Eo mi ne stò curciarellu
Hè faciule à scrive què
Davanti à s'urdinaturellu