Di Aragon u "Crepacori"
Hè una bibbia pà Matteu,
Chì sà puità lu scensori.
La rima hè lu so calleghju..
Tintinnarà pà i murtorii
Un sonnu corsu!micca abbreu!

U LAMENTU DI RAPPALLINU

Da scrive u mo pinseru
A penna vogliu aduprà
U foru hè à l’addisperu
Sentu dì quì è quallà
Ma chì sarà ‘ssu misteru
È ‘ssu pocu tralalà ?

In stu locu prilibatu
Hè ghjuntu un sociu novu
E ghjalline anu cantatu
È u ghjallu hà fattu l’ovu
Un palmu u s’hà nittatu
Vai chì u nidu u s’hà trovu !

Hè ghjuntu quì ciattu ciattu
Senza vulè si impone
Prima si cacciò à Mattu
Per divintà u patrone
Cum’è u cuccu hà fattu
In nidu cù u piccione

Fece nice d’assucià si
Cù u cumpare Zifranu
Inseme per dui passi
Andavan’ appalamanu
Eranu belli ‘ssi chjassi
L’oddiu era assai luntanu…

Zifranu si n’hè andatu
Per sustene à Matteu
Niolu era attaccatu
È l’hà difesu l’acellu
Dicendu « hè un piccatu
Megliu ch’e ci stia eiu… »

‘Ci chì dicenu in Bastia
Chì u nostru capimachja
L’amicu (?) Marcu Maria
Di u nostru cuccu s’impachja *
Li dicu bon’ prò li fia
L’astr’ à mumenti u si spachja

Scusate avà mi n’arvecu
À ‘ssu puntu di a canzone
A metafora l’impiecu
Ma vi taciu u so nome
O’imè… tristu distinu…
Quì s’affacca « Rappallinu » !



* http://foru-corsu.forumactif.com/prosa-f2/u-piscadore-e-u-mazzeru-t846.htm
(ci vole à fidighjà in ghjò... )

Avà vecu veramente
Chè tù pensi à l'arritrosa
Si n'arvde tutt'a ghjente
A to musa hè ghjilosa
O lu corciu Ghjancasgiolu
Avà si ritrova solu...

A to rima invidiosa
Un cappia più chè tristezza
Megliu à stà bocca chjosa
Incu la to amarezza
Piuttostu chè d'attaccà
Tamanta fraternità....

Cù Rappalinu a sai
Un vulemu fà a guerra
Un vulemu nisiun guai
Per a nostra bella terra
Cusi feremu l'unione
Per sparte a nostra passione...

Avà vogliu aghjustà
Cù u versu u più sinceru
Di u scrittu chì emu à fà
Un saré micca strangeru
Chì l'aghju da palisà
Tù si un veru...MAZZERU !!

O Cirlì sta sera avarè u toiu...

S’ella hè quessa chè tù pensi
Ch’ eiu stocu à nidu’mprestu
A ti dicu franca è chjara
È pò supitu t’arrestu
Eiu ùn aghju nisun’viziu
Chì ne sò propiu onestu

U cuccu mi pari tù
Chì ne hai a manera
Quande tù faci cuccù
È pò ti stai à piattera
Quande tù scrivi dinù
E to rime à straziera

Forse chì ti pare d’esse
U biancasgiolu muscante
Di puesia annacquatu
Principe mezu à e piante
Fiore sì à sente à mè
Quant’u porcu hè musicante

Per difende à Niolu
S’è cuntemu à nant’à tè
Tandu ne simu affullati
À pocu d’appressu à mè
È pò ci n’hè à bastanza
Pecure quì à fà mèèèè…

Per finisce diciaraghju
C’o mi stogu à a mio piazza
Quella di Marcu Maria
Mi si pare bella pazza
Chì quì da mane a sera
Tutt’ognunu u si tazza

Vi vogliu fà tante scuse
Vi vogliu fà tante lode
E mo rime sò cunfuse
U mo ciarbell’ hè ‘n bullore
Mi pentu di cert’ accuse
Voi ùn sit’ un malfattore

Car’amicu Rappallinu
Sintit’ à u biancu fiore
Chì senza ess’ induvinu
Vede u vostru culore
Chì u vostru u distinu
Hè d’ess’ amministratore

Vecu ind’u vostru ghjocu
E vostr’idee palese
Accatizzate u focu
È manighjate l’offese
Ma, di u rè di stu locu
Vo’ pigliate e pratese

Parlu di Marcu Maria
Forse avarete capitu
Chì tene a so famiglia
Distribuendu i tìtuli
Dumandate à Matteu :
Face sempre per u megliu…

Hè vera ùn site cuccu
Site assai più mastinu
Manc’appena site zucca
È site puru malignu
A sà u Rattapiluccu*
È l'ampararà Cirlinu…

Ma à ciò ch’e vecu avà
Simu di tù è di tè
In più mi vecu trattà
Di capra chì face mèèèèè
Qualchì famigliarità
Tandu mi permittarè :

Hè vera cuccu nùn sè
Avà ne sò persuasu
Piuttostu mi pari à mè
Qualchì topu ficcanasu
Ti chjappu per u cullettu
È ti lampu in cabinettu…



* Rattapiluccu : topu pinnutu, saccu minutu, ecc…

Era una macagna, o micca, finalmente, a partenza di certi ?

Avà mi ne vò dinù
À rifiatà duie stonde
Luntanu di ssu cumbugliu
E cose vanu più tonde
È forse di a 3G+
Quallà ùn passanu l'onde

Dunque stuzzicate puru
Ma ùn vi possu risponde



À un' di 'ssi ghjorni !