I mo parenti facenu parte di sta generazione di Corsi da sempre ingirati di lingua nustrale ma « furmati » è soprattuttu allevati in francese, "nova" lingua di a tramandera, da i so propii parenti (cursofoni). Ne risulta ch’elli cunnoscenu e parolle (masimu u mo babbu chì hà fattu u pastore durante dui anni), è ogni tantu a si provanu ancu elli à parlà in corsu (mai discursate sane ci vole à precisalla), ma a so lingua "naturale", m’incresce à dilla, ferma u francese. Per cunseguenza, è di logica, aghju ricevutu ancu eiu un'educazione in lingua francesa. Senza parlà di u sistema sculare, da rifinì a faccenda, è di a sucietà ella stessa in generale.
Per furtuna, aghju sempre campatu cù a mo caccara (sempre viva oghje), allevata ella in corsu, a so lingua materna, à un'epica chì u corsu era assai di più una "lingua viva" chè avà... D'altronde, sinu à a so morte u mo caccaru ùn mi parlava chè in corsu. Quantunque, facenu parte tramindui di sti vechji chì si manghjanu "transcie di jambon"... Vidite un pocu u prublema. Ancu puru s'ella hè vera ch'elli sò capaci di sorte parolle è spressione "sputiche", perse in fondu di a so vechja memoria.
I mo amichi per a maiò parte ùn ammaestreghjanu micca a lingua, fora di e forme più "pupulare", à spessu tinte di francese (è viciversa, soprattuttu), o pezzi d'infrasate lampati quà è là (ùn v’ampargu nunda pensu !), ma una discursata sana sana in corsu mancu stampa... Per furtuna aghju ancu unepochi d'amichi cursofoni, giovani per u più, chì m'anu aiutatu è amparatu assai.
Sin'à stu puntu, possu dì chì a mo cumpetenza in lingua corsa ghjera guasi unicamente una cumpetenza "passiva".
Tandu, a mo amparera hè stata propiu u fruttu di una vuluntà persunale. Si puderia ancu parlà di presa di cuscenza linguistica (o identitaria ?), o una razza di bisognu prufondu ùn sò micca... Capunanzu mi paria sufficente di parlà in francese è di cursizà un pocu a sintassa, di aduprà à l'occasione una parolla corsa infrancisata o micca, una spressione... U mo scopu novu fù semplicemente di acquistà l'arnesi linguistichi da pudè sustene una discussione intera in lingua corsa.
Aghju capitu subbitu chì u scrittu mi pudia arricà qualcosa. D'altronde, cum'è l'aghju detta, ùn avia tanta ghjente à l'intornu capace di fammi fà i prugressi à u so cuntattu... Masimu s'è no tenimu à mente chì u corsu parlatu oghjincu hè quantunque bellu alteratu da u francese, ch'ella ci piaci o nò. Mi sò sciaccatu e gramatiche, i libri, l'articuli... À un ritimu piuttostu infrebatu, ancu. Un accostu più universitariu chè altr'affare a paliseghju vulinteri, è senza vergogna. Ogni ghjornu chì passa, cercu di parlà sempre di più, da tuccà à "l'autenticità". Ùn dicu micca chì u scrittu sia "currottu", ma solu chì a verità di una lingua viva ùn si pò truvà in priurità chè ind'è a so pratica urale cuttidiana. Senza criticà u travagliu di i scrivani, mancu appena (masimu s'elli mi anu aiutatu indirettamente à fà i prugressi ch'o aghju fattu !), ma ghjè quistione di sennu.
Oghje chì ghjè oghje possu dì ch’o mi sbrogliu abbastanza bè in corsu (à l’urale), ma chì quantunque a mo spressione in lingua nustrale (senza mai passà per u francese, dunque) ferma in parte u pruduttu di un sforzu intellettuale individuale micca sempre naturale. Per avà, ùn sò ancu capace di pensà u mo discorsu sanu sanu in corsu, d'avè sta "naturalità" di a lingua ch'o ricercu tantu. È què mi face arrabbià assai. Forse chì allocc'à qualchì annu di pratica regulare l'affari cambieranu.

À voi. Cunfessatevi.

CU I MIO GENITORI BABBU MAMMA CACCARA MAMONA CACCARU BABBONE
CUN PARECHJI ZII E ZIE ( MICCA TUTTI )
CU I MIO PAESANI E AMICHI QUANDU I PAESI ERANU PIU PIENI CHE OGHJE E CH'UN SI
SENTIA ANCU PARLA IN FRANCESE CHI C'ERA PARECHJI PASTORI E ANZIANI
E LONGHE SERATE A U FUCONE E STONDE PASSATE A FRUSTA I PANTALONI
APPRESSU A L'ANIMALI I GHJORNI DI CUGLIERA O DI TUMBERA
NANT'A I SCALONI DI A CHJESA A MEZU A I NOSTRI VECHJI
TUTTU CIO CHI PER DISGRAZIA E GENERZIONE A VENE UN CUNNOSCERANU PIU

Eiu lighjendu u libru di Stefanu Pergola.

Eiu lighjendu i corsi di corsu di Matteu Mattei nant'à u foru corsu !

O amicu ùn fà micca u mudestu, e' quand'e' t'aghju cunnisciutu u corsu u parlavi dighjà currente

Eiu ùn sapariu troppu ciò chì risponde, ùn possu dì ch'e' aghju amparatu daveru, vogliu dì amparà una cunghjucazione o una lista di parolle.

Pà a famiglia, ùn aghju cunnisciutu cà à minnanna cumè "vechju", ma babbu ancu par esse di a ginarazione dopu avia u corsu cumè lingua materna, prima di u francese, è hè statu allivatu in corsu. Mamma u sà parlà bè anch'ella (ma ùn hè micca a so lingua materna). Un discorsu in corsu u sanu fà tramindui (soprattuttu babbu ch'avia più faciulità), è in casa parlavanu in corsu a mità di u tempu diciaraghju... ma trà di elli, micca cù mecu. In paese, cù minnanna, si sarà parlatu corsu ancu i 3/4 di u tempu.

Aghju cumenciu à parlallu quand'e' sò ghjuntu in cuntinente, cù altri Corsi, ma à u principiu di sicuru ùn era micca linda linda, mi mancava a pratica, è ancu e parolle. Abbastanza prestu sò statu bramosu di cuntalle, (ne cunnisciu à pocu pressu 1000 cusì) è dunque di scrivele. Hè tandu ch'e' aghju avutu da amparà à scrive, par pudelle nutà bè : m'aghju compru u libru di Comiti "a Pratica è a Grammatica", hè tuttu spiegatu bè, face chì appena compiu u libru, sapiu scrive à pocu pressu cumè avà (NB : aghju cambiatu calchì cunvinzione pà a me scrittura parsunale dipoi).

Dopu simpliciamente dumandavu (à u tintu di babbu u più) una parolla quand'ella mi mancava. Cusì sò vinutu à cunnosce assai parolle (parlu di più di 1000) in pocu tempu (menu d'un mese), ciò mi face pinsà ch'e' ùn l'aghju micca "amparate" daveru (nurmalmente ùn hè micca pussibule à amparà tante parolle in cusì pocu tempu), sicuramente e cunnisciu dighjà di manera "infurmale", "incerta", "passiva" è sò state "attivate".

Dipoi, stò in arechje è tengu mente tuttu ciò ch'e' sentu ch'e' ùn cunnisciu micca. Postu ch'ella stalba suvente, ne ampargu sempre, ne sò di più oghje cà 1 sittimana fà, è ne saparaghju di più st'etima chì vene cà avà...
Face ch'ùn aghju manc'appena un "accostu universitariu" di a lingua.

Aghju dinò lettu i libri, ciò chì m'hà parmessu in più di scopreli di cunnosce u parlatu di l'altri.

In quant'à pinsà in corsu, ùn ti ne fà o amicu, par mè ùn pensa nimu in corsu oghje
Ne parla Geronimi ind'un ducumentu chì ci vole ch'e' ritrovi.

in casa aghju sempre intesu parlà corsu cù i mio genitore, babbone è mammone. parlavanu corsu trà elli è spessu cù me, mà eiu avia l'ubligazione di risponde in francese . ava, si so decisi à parlammi corsu è pruvemu à batachjà inseme. mà vene podassi troppu tardi per permettemmi di parlà cumu mi piacerebbe... in quantu à a scrittura, ghjè un'altra affare...aghju cuminciatu in ghjennaghju cù i corsi "apic"... provu è straziu (u mio prufessore ha fattu tuttu cio ch'ellu ha pussutu mà so un casu!). ava mi ghjovu di u foru per continuà à amparà

Eiu ùn lu sò ancu bè : tutti i mo paisani a ti diceranu

Eiu l'aghju amparatu...à u telefuninu cù Francesca

O ghjente siate serii un pocu

Eiu ?
Ùn lu possu mancu dì incù certitudine.`

Un pocu cù a famiglia, un pocu à a scola, un pocu cùn cert'amichi, un pocu cun d'altri, un pocu cù e canzone...


Podasse chì hè per quessa chì a mio manera di parlà fubbe cusì imperfetta è certe vole cusì strania.