Eccu un scrittu cortu cum'elli piacenu à Matteu Mattei

Citation:

Appughjatu contru à u muru caldu di a stanza è fighjendu a parsona perfetta di sta sirena stracquata à u so latu, Michele si dicia chì l’esiliu, fattu fine , ùn era cusi difficiule à suppurtà. A brunetta era una fata è a stonda era stata tremenda : cinque volte di fila avianu fattu l’amore , indiavulati, guasi scimituliti da i ragi di u sole chì si pisava oramai à l’orizonte infiaratu. Dipoi ch’elli eranu turnati da st’apperitivu ind’è un’amicu cumunu, ùn avianu spustatu una siconda. Cantavanu cù l’anghjuli, o forse i demoni mi dicererete, ma avà a donna spatansciava è s’adurmintava à u so fiancu. I so capelli bruni chì falavanu longu à u so spinu li ramintavanu quelli di e zitelle ch’ellu avia cunnisicutu in paese ùn hè tantu, nanzu d’esse custrettu à fughje. Dipoi ch’ellu era ghjuntu in Cuba, trè anni fà, ùn avia avutu tantu tempu per lagnassi. Avia avutu u so da fà è s’era sbrugliatu propiu bè. Buscà una casa, ritruvà uni pochi di Corsi di u circondu, circà i « cuntatti » da fà i so affari ; a riescita vensi prestu è cupria dipoi e più belle donne di a cità nott’è ghjornu. Guasi omu si pudia dumandà cum’è ellu facia per travaglià, per stantà u so pane. In fatti, travagliava pocu è micca chì a ghjente lucale si primurava di a so intrapresa è ellu ùn avia più chè à incascià è mettesi in soldi in banca ogni fine di mese. I so impiegati eranu pagati abbastanza bè riguardu à ciò ch’elli pudianu vince in altrò è Michele t’avia a reputazione d’esse un’omu generosu, rispettatu è stimatu da tutti, masimu da e donne ch’ellu attirava per via di i so soldi, u so putere chì crescia sempre di più ma ancu da un fisicu d’omu maturu è forte. A trent’anni, avia ghjà una certa sperienza di a vita chì ùn era stata sempre faciule per ellu. Cinqui anni fà in Bastia avia avutu l’edea tremenda d’apre una cantina à l’usu di quelle d’innanzu. Una cantina cum’è quelle di u Bastia di Pesciu Anguilla, quelle chì Sebastianu Dalzetu, u so scrittore preferitu, facia campà ind’è i so scritti cum’è nimu a sapia fà. Dui di i so amichi i più cari, dui fratelli di u paese s’eranu lanciati in l’avventura cùn ellu. U locu ch’ellu avia sceltu era magnificu, una vechja cantina cù loghje di petre zecche è terrazzoli assuliati chì scuprianu u vechju portu sanu sanu. Omu ci pudia vene à tutt’ora di u ghjornu è di a notte da beiesi un bichjeru sia d’alcolu sia di bivenda fresca. Si pudia strappà un buccone cù robba di qualità pruvista da i piscadori è i macellari i più cunnisicuti di u rughjone Bastiacciu : buttaraga da favvi perde u cerbellu, pesci freschi, anguille arrustite, anchjuve, vinu da sciappà e petre è robba purcina di sottu scala. Ogni tantu i dui fratelli sunavanu di ghitarra è cantichjavanu vechje canzone di Rocchi, Ciosi ò altri gruppi di u Riacquistu. U locu era diventatu assai prestu u locu à a moda è vechji quant’è zitelli ci venianu à ritruvà una Corsica ch’elli credianu guasi smarita. A spessu cantadori è sunadori di i più attalintati venianu à intriccià voce è musiche nustrale di manera naturale, cusi, à l’ispensata è sin’à u fà di u ghjornu. Tandu un c’era più grande piacè chè di pigliassi un caffè o un suchju d’aranciu frescu à u fà di u sole. L’affare viaghjava assai ma per pudè cuntinuà, c’era vulsutu à pattighjà cù certi da assicurà a tranquillità di u locu è di l’impegati. Un eranu scarse e squadre di sgaiuffi chì per un si ò per un no, mettianu sottu sopra i lochi di a notte Bastiaccia è ci vulia à assicurassi una « prutezzione » da pudè travaglià in pace. Un eranu cambiate e cose in Corsica dipoi anni è anni, per ùn dì seculi è seculi; senza l’accunsentu di qualchì capimachja d’una banda rispettata ùn si pudià sperà travaglià di modu serenu. A Michele ùn li garbava tantu sta manera di fà, sta manera di pinsà è di perde a so indipendenza ma à capu à dui mesi a pressione era cusi forte è e « dumande » cusi numerose chì malgradu tuttu u so curagiu è a so vulintà, c’era vulsutu à fà una scelta è affiancassi di l’omi i più timuti di a cità. A principiu tuttu si passava à l’incantu : i so « prutettori » venianu à spessu, ma si facianu discreti è ùn scumudavanu micca i clienti. Bastava à fà capì à e squadre di ghjovanni cù i denti belli arrutati chì quì ùn c’era nunda à buscà fora di robba squisita è stonde di benistà è d’allegria. E serata si seguitavanu cum’è ind’è un sonniu, pueta è impruvisatori di a Corsica sana ci passavanu anch’elli stonde di spartera accant’à sunadori di manduline è viulinu.Certe serate ci vulia ancu à riservà a so piazza per pudè esse ben piazzati o ghjunghje à bon’ora da truvà un scornu di bancu liberu . Michele è i so amichi campavanu ind’è un mare di latte ma u piacè ùn durò tantu. Ad un trattu schiattò una guerra spavintosa tra i sfarenti clani chì regnavanu nant’à i bar di a cità. Ancu i pruttetori di Michele avianu u so da fà cù ghjovanni chì ùn avianu più nè rispettu nè paura, nemancu un suppulu di pietà. In un milampu, trè di l’omi i più cunnisciuti di a cità sò stati tombi sottu à assalti d’una viulenza scunnisciuta sin’à i gjorni d’oghje. A l’ora di l’apperitivu, piazza San Niculà, un camiò di CRS arrubatu s’era cansatu à mezu à a strada è trè omi incapucciati avianu sbattutu di mitragliosa quattru clienti chì ghjucavanu à carte. U lindumane un’omu cù a so moglia eranu tombi in u so lettu, sfigurati da e palle d’una Kalachnikov. Di scimizia in vindetta, dece famiglie addulurite avianu purtatu i soi in campu santu in una settimana. Prestu ci vulia à rende serviziu à i so novi amichi è a cantina diventò u rifugiu di quelli chì u duvianu prutege. Stranu paradossu. Avà tuccava à ellu à porghjeli una manu . Ogni ghjornu venianu à ritruvassi quì, ind’è una salla appena scantata da l’intrata cù dui omi in arme chì survegliavanu è chì cuntrullavanu tutti i clienti chì vulianu entre. Un c’è bisognu di dì chì assai in furia a cantina diventò guasi diserta è chì solu quelli di a so squadra ci venianu à ghjucà à carte, à l’agrottu di i so nemichi chì i circavanu ind’è ogni quartieru di a cità. Ma a viulenza s’invitò assai prestu ancu ind’è Michele è una sera à l’attrachjata, una vittura cù cinqui omi armati è decisi spuntò ind’è u carrughju. A risposta di Michele è i so amichi chì s’eranu priparati à st’assaltu fù l’altura di a situazione. Ancu i dui fratelli avianu rimpiazzatu a ghittara da un fucile novu framante da mette in fughjita l’assalatadore partuti lasciendu daretu à elli dui cadaveri chì ghjacianu in un mare di sangue nant’à u tighjatu di u vechju portu. Oramai Michele è i so dui cumpari eranu intruti cù fracassu ind’è u mondu di a viulenza è di a vindetta ch’elli avianu sempre circatu à fughje. Duie buciartule chì saltanu in l’erba longa è fresca di stu mese di maghju. Maghju caldu è assufucante, un sole da lascià u so pilone da cantu ancu di notte pagna. Dopu à un’apperitivu cù i so dui amichi, Michele s’era fattu arrustì duie pescie nant’à a teghja vicina à u so pagliaghju in bor’di fiume, à dui passi di u paese. Stu locu, l’avia datu a so mammone dui anni fà, nanzu di parte per l’altru mondu. A sapia chì à u so figliulinu li piacia sta vita calma è serena in paese. Partia à piscà è punia u so ortu ma cù a cantina avia lasciatu cascà i ligumi è si ne cullava ogni tantu à gode à so pace cù u vintulellu frescu è u chjuchjulime di a vadina chì curria sott’ à a so terrazza. Sott’à a pergola di vigna verdicante, Michele si ripusava ma sempre tenia un’ochju apertu dipoi a settimana scorsa. A Cantina era chjosa dipoi a passata sanguinosa chì l’avia vistu tumbà un’omu da u piombu, almenu ch’ellu sia unu di i so amichi chì da tantu chì a battaglia fù feroce, era dificiule di sapè quale avia sparatu. Oramai eranu tutti ricercati è in Bastia ùn c’era più manera di fassi un’affacata nanzu chì a situazione fussi appaciata. A sapia chì avia da stà una bella stonda in paese chì quì, nimu ùn sarebbe abbastanza scemu per cullà à circalli. E buciartule saltavanu è si vultulavanu, si cullavanu l’una annant’ à l’altra . Michele si dumandava s’elle facianu l’amore o s’elle liticavanu chì ùn c’è manera di sapè cù st’animali strani . Ad un trattu, i dui animali si spicconu è fughjonu in un batter' d’ochju, ognunu da u so cantu. Un trostu abuminevule rumpò u silenziu è feci piantà i canti è i pass’è veni di e rundinelle. Duie sparate eppo à capu à una stonda chì paria un’eternità, i mughji è i lamenti di e donne di u paese cullavanu in celu è intrunavanu u rughjone sanu. Ancu da u so pagliaghju scantatu, Michele avia intesu sti mughji di dulore chì li strappavanu u core. Avia capitu subitu, eranu cullati in paese è avianu tombu i so dui amichi, quelli cù quale avia spartutu tanti è tanti mumenti beati. Per ellu, ùn ci serà nè cunduglianze nè intarru ; oramai era diventatu una preda, un animale salvaticu chì duvia salvà a so pelle è in quattr’è trè sette, avia appruntatu una musetta da piglià a machja. A capu à trè ghjorni spuntò in Centuri è un’amicu di soiu u purtò in cuntinente, in piena notte… Oghje sò quattr’anni chì i so fratelli, cum’elli i chjamavanu tandu, sò partuti per l’altru mondu. Dopu à uni pochi di mesi passati ind’è un’appartamentu in Marseglia da sapè s’ellu pudia vultà in Corsica, era partutu per Cuba lasciendu in paese i so genitori è tutt’i so altri amichi. A so fabrica di cigarette, compra à bon pattu à un Corsu chì si ne vulia turnà ind’è ellu, era diventata una di e più grosse di a cità è Michele era riccu à millioni riguaru à u livellu di vita di l’isula ch’ellu avia fattu soia. Avia sappiutu ripiglià l’affare è falla ingrandà sin’à esse unu di l’omi i più putenti di u circondu. Campava in un mare di latte è da veru ùn rigretava mancu più d’esse partutu. Soldi, casone magnificu cù tuttu l’asgiu pussibule, belle vitture, sole è rena tuttu l’annu, chì pudia sunnià omu di più ? In più di què tutte è più belle donne, ricche è povare eranu apressu à ellu è li bastava un’uchjata da attiralle tutte in casa soia. Era felice quant’è si pudia sperà è nunda u pudia cuntrarià. U sole scaldava sempre più forte è a zitella bruna durmia sempre quand’ella fù discitata di colpu da u telefuninu chì strappò u silenziu. Era babbu. Era d’un pezzu ch’ellu ùn avia chjamatu ma a so voce feci subitu capì à Michele ch’ellu ùn chjamava solu da piglià qualchì nutizia. Mamma era morta. U core. Nimu l’aspettava è Michele ùn avia mancu pussutu entre in paese per basgialla un’ultima volta. Un era cusì vechja. A sessant’anni li firmava tante è tante stonde beate à campà. U destinu era crudele è per a prima volta dipoi anni è anni Michele era culpitu da una disgrazia. E sta volta, Falcina ùn avia fattu nice ; l’avia pigliatu a so cara mamma. Era intrunatu, firmò senza voce è a bella zitella s’accorsi subitu chì qualcosa di pessimu era accadutu ; si n’andò cucina da priparalli un caffè eppo si licenziò à a mutesca, rispettendu u dolu di st’omu chì l’avia fattu l’amore cù una dulcezza chì mai ella avia cunnisciutu.U sole era più altu ; passatu da sopra à u tettu i so ragi ùn riscaldavanu più à Micheli chì era ingutuppatu oramai da u fretu è l’angoscia. A paglia Orba. Michele l’avia ricunnisciutu subitu ghjunghjendu cù l’avviò. Era passiunatu di muntagna è ogni volta ch’ellu partia in cuntinente, li piacia à cuntemplà i so lochi è à pruvà di dà un nome à ogni muntagna chì s’alzava à i so pedi. Sott’à l’avviò si ricunnuscianu dinù a Balagna eppo a spiaghja di Saleccia ; magnifica, striscia bianca immaculata inturniatu d’u verde lussuriante di i pini d’Alep è di u mare turchinu è traslucidiu. Mancu in Cuba ùn avia vistu simule paradisu ma sta volta ùn ci serà l’arte di fà u turisimu. Dopu à l’intarru di a corcia di mamma, li ci vulerà à scappà prestu chì ùn averà tantu tempu. Passatu u rispettu di u dolu cum’ellu si face sempre ind’è noi in quelle circustanze dulurose, a sapia chì i so nemichi ùn u lascerebbinu micca gode di l’aria di a so Corsica. Dui ghjorni, eccu ciò chì l’era permessu. U tempu d’accumpagnà Mamma à u Campu Santu è di riparte. Era ghjà bè. Dopu à una bella scuzzulata da sopra à Teghime, eccu Bastia à manu manca . Malgradu a luntanenza Michele pudia ricunnosce u vechju portu è ghjughjianu à gallu tutti sti ricordi. A cantina, e rise cù i picci è e serate tremende. A fucilata in carrughju è a paura chì u purtò à difendesi malgradu l’odiu ch’ellu avia per a viulenza. A trappula chì si chjudia nant’à i so dui amichi è chì u mandò sin’à l’America Latina. Curria una lacrima, pò duie è trè: tra sti ricordi pisivi è u dulore di a morte di mamma, Michele ùn si pudia più ritene è lasciava sguttà tuttu u so addisperu. Chjudì l’ochji è ùn l’aprì chì quandu l’avviò tuccò u catramu di Poretta. Era ghuntu in terra Corsa. Babbu era quì chì l’aspettava daretu à u vetru di u campu d’aviazione. Subitu si lampava in i so bracci da ritruvà u calore chì l’era mancatu in esiliu, stu cunfortu chì solu a famiglia pudia arricà è chì e decine è decine di donne d’ogni paese ch’ellu avia cunnisciutu in Cuba eranu incapace di dà. Si sentia torna zitellu, li paria di vultà più di vint’anni in daretu quandu u so babbu turnava tarde da u travagliu è chì u sgaiuffu traversava u longu curridoru di a casa per saltalli adossu. L’emuzione era tamanta. Tuttu l’amore ch’ellu ùn avia pussutu dà a mamma nanzu à a so morte u vulia fà passà attraversu à u so babbu. Currianu e lacrime da empie un stagnone eppo i surrisi vultonu, cum’è s’è a corcia di mamma i pudia vede da l’insù è ch’ella li dumandava d’apprufittà di sti dui ghjorni di cuccagna à passà inseme malgrade e circustanze dulurose. Ella ùn avia avutu a furtuna di rivede u si figliolu, Falcina s’era messa annant’à a so strada. Vulerebbe tantu chì u so maritu è u so figliolu gudessinu di stu piacè di ritruvassi. A sapianu, a risintianu. A valisgia era ghjunta dipoi un pezzu è girava sola nant’à u « tapis roulant ». U tempu s’era cansatu una stonda. Era ora di parte chì a famiglia è ‘amichi l’aspittavanu in paese. A vittura era ingarata in fondu à u parking. Pigliendu u so figliolu à bracceta, u babbu s’era fattu torna pruttetore è lampava un’ochju in ogni scornu da assicurassi chì nimu ùn l’aspittava cù gattive intenzione. Ghjuntu vicini à sta vechja vittura ch’ellu avia sempre cunnisciutu, s’eranu scurdati di pagà a piazza di parking. Malgradu e prutestazione di u babbu, Michele si n’andava solu per regularizà a situazione. U so babbu u vidia alluntanassi senza pudè fà nunda ma cù un’angoscia chì crescia à ognunu di i so passi, po si n’entrò in vittura. Michele passava l’ultima fila di vittura eppo à l’ora d’entre ind’è u hall, infattava dui clienti chì venianu tandu ind’è a cantina è i salutava senza piantà. Ad un trattu, un trostu abuminevule truncava u silenziu. U tempu di capì ch’ellu era sempre vivu , Michele si vultò è vidì l’automobile di u babbu cù fiare chì cullavanu sin’à vulè tuccà u celu. Inghjinuchjatu una stonda, l’ochji brusgiati da l’addisperu, fighjava e so ultime sperenze partendu cù sta fumaccia nera chì scappava da a vittura calcinata…A Corsica ùn era più a quella ch’ellu avia cunnisciutu, a Corsica ùn era più a so Terra…

_________________
Un populu,una lingua,un foru !!

MAGNIFICA O MASCIU DIVENTI TALENTUOSU E AGALABATU BELLA STORIA
BE SCRITTA FELICITAZIONI A TE ARTISTU

appughjatu contru : arrimbatu...

Alè, critica subbitu ! lasceti lu scriva , à st'omu agalabatu !

A nutizia bona hè ch'ellu hà lettu omancu a prima parolla





















...a sò chì da GM ùn hè micca una critica ma un aiutu

Taroccu ! GM a sà !

Hà pagatu a piazza di u parking:

soldi ghjittati.

(cum'è tù a poi vede aghju lettu tuttu..)

Sò miraculi

Ie, chi he bella.
Un pocu trista, ma bella.

E u stilu he assai piu sufisticatu ch'e u meiu.

U SOLU AFFARE CH'UN VA HE CI PIU BELLU HE A U PRINCIPIU MICCA
A A FINE

cinque volte di fila avianu fattu l’amore , indiavulati, guasi scimituliti da i ragi di u sole chì si pisava oramai à l’orizonte infiaratu.

QUESSU SI CHI A SCIACCAVA CUM'ELLU DICIA CACCARU
CANNA DENTRU E PALLI FORA

D'APRESSU A ME MICCA SOLU U SOLÈ ERA INFIARATU

ùn hè micca male hè vera, malgradu qualchì picculu sbagliu in quà in là...

si sbaglia u preti à l' altari !