Sempre l'idee nove, issu Capitanu...

Sempri u 22, a sera

Aghju carriatu i mobuli tuttu u dopu meziornu ind'è Veneziana, chì facia una sbartachjera di quiddi. Puttana, so troncu, è un pocu uffesu, parchì ci vulia à veda 'ssu Mirvella com'iddu curria in i scali cù i futtogli o i tasgeri in coddu. Un veru ghjuvanottu. È ghjeu un vichjettu, un varmu, una merda... Infini, ùn la facciu più. In sudori è arrussitu da i sforzi, mi so cuntorru in muntagna è mi socu stracquatu in u canapè, aghju missu una mezora à rivena nurmali...

Accendu a televisioni è ùn ci hè chè cunnarii. Scantatu com'è socu, di i volti, aghju l'imprissioni chì 'ss'abruttiti di parigini chì parlani in u scrennu m'agressani è si pagani a me testa. Ùn supportu mancu u so accentu, i so tenci... Saraghju in traccia di duvintà razzistu da veru ?

Spinta a telè coddu à accenda l'ordinatori. T'aghju ùn so quantu missaghja d'Ulla.fr, lampu un ochji ch'ùn si sà mai, ma ùn ci hè chè vechji baccucchi in circa d'amori, mentri chì eu mi so scrittu pà u culu, è micca pà stà à senta l'argumenti curci di 'ssi burdani ch'ani fiascatu a so vita. Piddemu par esempiu Pashka013, Bouches-du-Rhônes : "1 metru 62 ; 84 chilò ; 42 anni ; impiigata cummirciali ; amu i priminati è i surtiti trà amici ; ùn accettu micca i fumadori ; circu un omu curtesu è dopu vidaremu..." Vidaremu chì ? Ottanta quattru chilò è in più si permetti d'essa difficiuli ! Po' chì buciarda, m'eti da dì ch'un tappu paghjesu hè capaci à strascinà u so lardu pà fà i priminati ? Mancu a credu. M'eti da dì chì 'ssa cunnaccia suzza ch'ùn supporta micca u fumu si pò pagà u lussu d'avè l'amici pà passà i so sirati cun iddi ? Mancu a possu traveda quissa ! 'Ssa cionciula duvaria prigà pà piddassi un colpu da u Capitanu, si duvaria strascinà in tarra à i me peda è dumandammi ch'e' li lampessi u fumu di a sigaretta in i nadila, è inveci di quissa, nò, madama circa "un tippu curtesu è dopu vidaremu"... Hè ghjà vista o butti, cuntinivighja à infangatti à a to cascia di superetta è laca a piazza à quissi chì ci ani calcosa à fà, annant'à Ulla.fr.

Hummm... Piuttostu andà à veda s'iddu ùn si passa nudda annant'à u Foru Corsu. Vicu chì Mattu Mattu ùn s'hè tantu attardatu, una impruvisata passendu ed hè vultatu... induva ? In u bughju di u mondu riali, pò dassi ch'iddu t'hà anch'iddu i castagni à codda, chì ni socu. Marcu Maria invia un missaghju di tantu in tantu, ma pudemu induvinà chì la faci pà a forma, accupatu ch'iddu hè à caccià una carreghja à un clienti bestiu è acciaccatu da u dulori. Pocu affari stasera, dunca.

Ah, ma vicu ch'e' t'aghju un mp. Hè u ghjovanu Tito. Apru u missaghju : "Capitanu, dipoi sempri socu u vosciu ammiratori u più fidu. Ùn mancu mai di rileghja i vosci scritti in Adattazioni Academy, mi sò piaciuti particularmenti i vosci adattazioni di Sardou è di Joe Dassin, i me iduli dipoi ch'e' socu ziteddu. Vurriu essa un ghjornu com'è vo, Capitanu, carcu à geniu, à ispirazioni, sfacciatu è sputritu com'ì vo sapeti. Chì hè u vosciu sicretu, Capitanu ? Comu fà par ghjunghja à a voscia altezza, eu ch'ùn so chè un varmu misareddu ?" Piddu u tempu di a riflissioni è infini arrispondu à u ghjuvanottu (ùn supportu micca 'ssa cundiscindenza di chjamà un ghjovanu "ghjuvanottu", ma quandu eru sempri cateddu Ghjacumu Thiers m'avia chjamatu cussì du' o trè volti, è dipoi aghju sempri pinsatu à vindicammi annant'à i più ghjovani chè mè) dunca rispondu à u nocenti Tito : "Caru, hè tuttu un travaddu d'essa un vituparatu cantanti com'è mè, ùn la so sì vo a fareti. Prima ci vol' d'avè calchì dispusizioni, par esempiu ùn la so, vi piacia di buffittà i biciartuli quand'ì vo erati bardonu ? Vi piacia di pisà a codda di i fiminuchji à a scola materna ? Vi piacia di piazzà un acu murdacci nant'à u banchiteddu di i vosci cumpagni di scola più debbuli chè vo ? Vi piacia di sciappà u grugnu di i fiddol' di flicchi o di palpulà a pattanechja di a fiddola di a prufissuressa di musica ? Sì vo rispunditi di sì à ugnuna di 'ssi dumandi, forsa chì vo seti annant'à a strada bona, ma ùn hè mancu sicura. Dopu chì vuleti ? Animà Adattazioni Academy à a me piazza ? Ma feti o ghjuvanottu, feti, ma mi dumandu sì vo v'avviditi di l'impurtanza di tamantu impegnu. Aghju missu l'anni pà arrighjistrà in fundu di a me chjocca i "tube" i più merzi di Daniel Guichard o Carlos, i canzunacci i più putrichi di Karen Cheryl o Ricchi è Poveri. Criditi ch'e' mi socu fattu in un ghjornu ? Aghju travaddatu, merè ! Aghju sudatu ch'ùn vi dicu nudda, mi socu abbuchjatu i boum di u marcuri sera è tuttu, cù ghjuvanetti sticchiti chì puzzaiani u pisciu, cù fiddol' di funziunarii chì baddaiani com'è rochja... Aghju sgubbatu, videti, è po' dopu cù a spirienza è tuttu so duvintatu l'essaru carcu à lumu è u tippu supiriori d'intilligenza chì vi parla avali. Dunca, ùn ci voli micca à addispirà, o caru, ma a strada hè longa, è ci voli à sapella !"

Hà piuvitu fora. Pocu affari, ma forsa dumani o dopu dumani 'ss'acquata farà prò ancu pà i funghi. Un colpu di teleffonu : Piratella hà compru un puddastru è voli cuddà à passà a sirata cun mecu. Mmmm.... Và bè, codda puri, è fà pianu chì ci sò i vacchi annant'à a strada, è a fumaccia da partuttu.[/size]

Ahh tanti strazii per diventà Captanu!? ne valerà a pena?

Ghjustu una cosa : chì hai contru à e figliole di funziunarii?

Un pullastru? haha averai sunniatu o furdanò, mi vedi scucinà per un omu, à mè??

Nò, portami piuttostu à u resturante, è dopu "videremu" cum'ella dice quella
Hè un seculu o dui chè tù mi prumetti quellu resturante à 500 eurò, ma ùn m'ai dettu in chì annu.

Invece passi u to anniversariu cù i masci di u foru è ùn m'inviti mancu. Vai, vai!

Pensu anch'eiu ch'emu à ride incù 'ssu ghjurnale!!

Eiu ciÒ chì vuleria vede, hè a FISCIA DI U CAPITANU nantu à quellu situ ulla.fr

"500 anni, orbu, goffu, sputritu, passiunatu di parolle brutte è amendu a sigaretta è a buttiglia...
Cerca solu pezzoni di menu di trenta anni , micca difficiule, accettendu e "paffate" (una specialità di meiu), chì ùn aprenu a bocca per parlà ma per altri affari.
Eiu prupongu u culu è basta.
Rumantiche (false o vere), botte (più di 50 chilò), vechje (più di trenta anni) passate a vostra strada, ùn sò interessatu...

Hè cusì? È ci sò assai risposte?

chì laghedda o Capità, chì laghedda

Site una banda di montaseca, à u Capitanu u pudete criticà dinù ogni tantu...

Passiunante

Tutta à u to avantagiu a sturietta, ma hè à casu...

Ghjova, a litteratura, ùn hè !

'Ssa Greta Hemrich... Chì bomba !