Mi vulerebbi stà in Corsica, andà a spassu per ssi monti e sti pughjali e parlà corsu cun a filetta, avale chi i corsofoni si so dati a a macchja, avale chi u "corsophone" l'èmu a cercà cu a ruspatoghja. Ma eo so luntanu, e un so quandu vulteraghju in i mo sciali, se aghju da vultà. A so, ghjè a liccia di tuttognunu: tutti avemu a vultà per trovà a santa pace, ma eo a so bene chi ci toccherà more altrove. Falgina ghjè a l'agrottu indi e culandi, ma fora, sempre fora...

A u corsu tocca amdassine per u mondu sanu, lontanu da i so affetti più cari. Eppo si ellu riesce a vultà inde u so paese, quandu omu ghjunghje in casa soia, un la ricunosce nemmancu più, e omu si sente strangeru inde a propria dimora. Ancu i so fratelli un so più quelli di tandu, quelli di a zitellina. Stranu destinu, strana sorte quella chi tocca a u Corsu.

Chi sensu ha nasce corsu? Perché noi continueghjemu a tene caru un scorciu di muntagna, un tettu di teghje sotta a u suleone, u rumore lindu di una funtanella, una bandera 'ianca e nera straziata da u maistrale. Perchi seguitemu a sunnià ancu sogni landani ?

Perché i corsi elli si affannanu a cercà cio chi un puderanu mai più ritrovà. Mai più, mai più...

Perchi mi ne so andatu? puderagghju dì chi era disoccupatu, chi bisognava a campà... Puderaghju dà dinù altre bone e gattive ragioni. Ma mi parenu tamante scuse. Vulia andamine anch'eiu.

Allora perché sta sera elli tornanu sti ricordi, memurie di un piazzile, vicinu a una ghjesgia, a mezu un mare di castagni?

Stalvatoghju e di l'andaccianu tontu.

C'era una volta un'isula inde u mare pacificu.
Nant'a st'isula benedetta crescianu lupini a buzzeffu chi deliziavanu e saziavanu assai l'omi quant'è e castagne in Castagniccia.

I lisulani dicianu chi sti lupini eranu "carote" senza mancu sapè cio ch'elle so "e carote", e ringraziavanu a Diu per "e carote".
Piacianu tamantu ste carote, a tal puntu che elli, i lisulani si facianu chjamà "l''omi di e carote" (e mica l'omi di i lupini, cume sarebbi statu più veriteru fà).

Ghjunse un andaccianu tondu, venutu da un si sa mancu duve. Stu tontu, l'andaccianu giramondu, ellu si mise a ride quandu li feghjavanu, a u mentre chi i lisulani manghjavanu tanti lupini ch'elli chjamavanu "carote".
U furesteru disse chi cio chi i lisulani manghjavanu nun eranu micca carote, ma lupini.
-"Se quesse so carote, eo mi chjamu Napulione Bonaparte, disse a voce rivolta l'andaccianu tontu, e rise ancu."

U tintu. Nimu u vulia crede. I lisulani imprecavanu, minacciavanu e uni pochi u vulianu ancu menà. Dopu e bone si ghjunse a e gattive.

A fine di a storia a ti lasciu compie, caru lettore

Hum... Quessu l'andaccianu si chjama un "culunizatore" : dopu à e prime resistenze naturale, hà fattu vene u Missiunariu chì hà spiecatu chì u Diu di e carotte era un impustore, è chì dunque u Veru Diu chjamava e carotte lupini è chì i veri antenati di 'ssi baulli eranu i "Gaulois" è fù u principiu di a fine di a civilizazione di "l'Omi di e Carotte" , chì anu datu u so nome dinù à una malatia psiscica chjamata "u caruttisimu", chì face piglià e visciche pè lumere.

Oghje sò indipendenti, vendenu alcollu di lupini per fà un falsu carburante "biologicu", patenu a fame è sò tutti briaconi, perchè l'alcollu ch'elli ùn vendenu per via di i prezzi internaziunali u si beienu!

Trista storia...

O Francè, s'è tù ti chjinessi un po' più di bon'ora ùn saresti micca cusì pessimista...

Si sà oghje chì "l'Omi di e carotte" (d'altronde a Sumenta è Serra facenu parte di stu populu...) ùn eranu micca vegetariani... è per secculi, u piattu più famosu di lisulani hè statu "Missiunariu cun carotte..." è ancu avale u si pò tastà, benchè l'omi di a carotta abbianu rimpiazzatu u missunariu da u porcu, chì avale sò scarsi assai i missiunarii chì ghjughjenu in l'isula!

Ghjè vera cara Francesca, tristu u stalvatoghju, ma face assai piacè listessu leghje chi tu, cara Francesca, e storiacce e e storione e sai compie, e benissimu.

T'aghju da fà une poche dumande abbastanza sceme, ch'ellu l'andacciu tontu e "missionariu" (senza fede) di u mo stalvatoghju t'averebbi possutu chere, s'ellu fussi sbarcatu, inde no, in Tavagna o a u campuloru (a e prunete forse? a Bravone, a l'Alba Serena-scusate a Poghju mezanu- Cunosci ste marine, Francesca?).

-Ma se sti lisulani di u Pacificu elli aduravanu a u Diu Carota ch'elli manghjavanu (a dilla franca, elli si sbagliavanu e manghjavanu lupini, lupini semplici, corci di un lupinu), a ragione nun serebbi perchi, tempi fà, un missiunariu (assai gattivu e astutu tamantu quellu, micca cume l'andaccianu tontissimu di u mo stalvatoghju) era sbarcatu inde elli tandu, e li avia fattu piglià fischi per fiaschi, a sti lisulani simpaticoni, volesi di "Carote per lupini".

Forse un ci è mai statu l'origine, un populu puru e vergine, nemmancu annant'a una isula chjuca, spapersa luntanu da noi, inde u mare pacificu.

Pace e salute per l'annu universitariu novu, a te Francesca, a te pumatoghja di a Olanda (ma voli scherzà...), e e tutte le brave zitelle (e intelligenti) di a nostra Corsichella.

Scusate per i sciempii (a Olanda...), ma, no scrivani vani vani, avemu pocu tempu nanzu di andà a l'eternu, o a chinacci.
Allora bisogna a scrive prestu assai.

Pumatoghja di l'Olanda. Forse t'aghju scontru.
Un seresti micca a figliola di un Olandese chjamatu Ollandini, a sai, quellu di l'autocarri?
Eo era un impiegatucciu di stu signore, in Aiacciu tandu, mille anni fà. Avia un gren bel autocarru. Quantu era felice e contentu l'Orsacciu, tandu, in terra soia. Una vita da sgio, facia L'Orsini bellu, propriu, e un parlu mancu di e Muse di a Tavagna...

Per caccià a picondria, ci 'ole a ride ancu a mezu a a tragedia, o cara e bella ghjuventù corsa.

Ma un sminticate, zitelli di mamma, ch'aghju nanzu tuttu a caccià a fame (o a sfamà) a dece criature (Larenza a rossa, Petru Paulu u moru, Anton Francescu u pilatu, Rinaldu capibiondu, Ghjuvan Guidu, Marcu Andria e Petru Simone, Pasqualina, Orsula e u pargulettu caru di babbitu, Orsucciu).

Andate a buscà i mo libracci e i mo libroni a u supermercatu di i fulelli, e ancu a Toga. A Mezzavia un a so se si pudenu trovà ssi capulavuri, postu chi i suttanacci si lagnanu di a mo scrittura, ancu troppu bastiaccia e lucchesina (me l'ha dettu Petru u chinese, di Tagliu).
Chi vulete, inde no, omu ghjè sempre troppu qualcosa...: Petru ghjè troppu lucchese, Francesca ghjè troppu mariganinca, Paulu ellu è troppu pinzutu, e Maria ghjè troppu tonta.
O Corsica la meia, serebbi ora di falla finita incu ste lite.

quissu mi pari ch'eddu piddi : i cazzi par zifuleddi !!!

a nostra amica Pumataghja si cappia....

Si pò dì chì stu stalvatoghju cullettivu (à usu "cadavre exquis") hè carcu à simbuli!!

Eu, ùn ci aghju capitu nudda...

A dilla franca, manch'eiu...ma facciu nice.

Francesca puderesti spiegammila a fola, perchi un ci capiscu un acca...

Cari fratelli. Attenti a u diavule e a e diavulerie. Simu tutti una mansa di boni cristiani no, e eo l'aghju dettu a Belzebù, chi ci vene a dannà qui, nant'a ssu foru corsu.
Vade retro satanas (Lerznaaargh)

"Pace e salute Amicu Lerznaaaaargh (o forse serebbi ancu megliu auguravvi "gastighi e scumpienti?". Ma simu curtesi, no di a Tavagna. Simu una razzaccia educata. Tutti si ne collanu in Corti, a l'università. Inde no, mancu una sumera, a trovi, mi)

Anch'eiu aghju a le volte provu una certa simpatia per u diavule.
Ma pregu Diu sempre, e m'arricumandu a Ellu, u signore e a i so santi. Ghjè un cristianu gentile, stu turcu di Orso Orsini. Vade retro satanas, o averaghju a chjamà l'esorcista...