Bona sera à tutti.
Prima, vi vogliu ringrazià per i vostri cumplimenti, à tutti.
Per "rispundò", mi pare ch'aviu sempre dettu què, mà hè vera dinù ch'ùn mi pare micca di l'avè intesu, allora, podasse chì mi sbagliavu. "risposi" è "rispose", l'aghju dighjà intesi, quessi...

Manc'eiu, ùn pinsava chì sta storia fusti cusì longa...

Mà eiu, ùn hà sapia micca chì Francesca era dighjà sbarcata nant'à Gherccebà, chì eiu, ùn ci sò andatu, quallà... Rettificheraghju...

U megli serà podasse ch'o chjamessu à Lughjarcu, ch'ellu venissi quì à cuntavvi veramente cio chì s'hè passatu... quandu serà esciutu di prighjò...

" Nove fiumicelli, una sola surgente"
("i nuli di Yen Tu", Hoang Quang Thuan)

Ùn m'era mai intesa cusì viva, serena, lebbia, a mente è u core infine liberati di 'ssu nodu d'angoscie chì ùn m'avianu mai cappiatu da chjuca, da quandu era stata spiccata da mamma.

A luce rossa m'abbagliulava ma sintia un caldu umidu chì mi ramintava Saigon à a vigilia di a mussone, l'ambiente di a mo prima zitellina, quella chì mi cunvene u megliu! Mi sintia in casa meia. Cumu hè ch'ùn l'aghju trovu stranu 'ssu calore, postu chì in u munasteru facia à u più 5 gradi i ghjorni "caldi"?

Subitu aghju cercu u corpu di James, ùn mi paria più d'esse una persona cumpletta senza ellu, quant'è chè no fussimu diventati duie metà di una sola persona. Ma ùn ci era chè u viotu, a mo manu ùn tuccava chè a petra dura di ...un scogliu! Eiu chì mi lagnava di u tatami!

Avà sì chì era discitata! Mi truvava nantu à un isulottu à mezu à l'uceanu è un mostru alutu girava da sopra à mè in un celu carcu à nuli pronti à schiattà. Ben chè i nuli fussinu zeppi è grevi, a luce di un sole russicciu, inchietante cum'è a bocca di l'infernu, l'attraversava senza difficultà.

U mostru, mezu acellu mezu bucertula, ùn mi vulia bè, quessu, o allora sì, li piacia, per manghjammi cruda. Era chjara chì 'ssa bucertula vulente cù un bizzicu longu era carnivora! Ma INDUVE ERA eiu? Quandu u mostru
s'hè lampatu annant'à mè, aghju cappiatu un mughju spavintatu è subitu dopu aghju intesu una risa chì m'hà intrunatu : Oshimo era quì nantu à u scogliu, à pusà in a pusizione di meditazione!

"Ùn ti pò fà nunda 'ssu bizzichilongu, Okoko, ùn ci hè chè u to spiritu quì! è si campava di risa...

"Maestru! induve simu? chì femu quì?"

U mostru era smarritu cum'ellu era vinutu.

"Simu nantu à una di l'ultime pianete di l'universu, à 300 000 annate lume da a Terra...Ma propiu vicina d'ella in una altra dimensione, hè per quessa chì sì passata cusì faciule. Hè a gemella di a nova pianeta scuperta da i scentifichi, Gliese 581 c, chì ella ùn hè chè à 20,4 annate lume di a terra, ma invece in a dimensione spirituale si trova luntanissima. "

- O Maestru, ùn vole dì nunda "una di l'ultime pianete di l'Universu" , l'Universu hè infinitu!

" Ah iè? fece Oshimo cù u so surrisu mezu ironicu. Ai una idea precisa di l'infinitu, Okoko? "

Duvia ricunnosce chì ùn mi figurava manc'appena ciò ch'ellu pudia esse l'infinitu.

"Cumu si chjama 'ssa pianeta"?

"A chì ti ghjova di cunnosce u so nome? "

In tempu nurmale m'averia annerbatu ch'ellu mi rispundissi sempre cù altre questione. Ma nunda mi frasturnava più.

"Ebbè, cumu ne possu parlà à i mei quandu rientru?"

"Dalli u nome chì ti piace. Illumina, Acquaterra, Russetta, chì ne sò?

" Bò allora, Illumina"...è à 'ssu mumentu aghju pinsatu : "è l'illuminazione, aghju una scianza o nò di cunnoscela? "

Cum'è s'ellu m'avessi intesu, u Maestru m'interrugò :
"Okoko, ti aghju da pone una questione. Chì era u to visu d'urigine prima di a nascita di i to genitori?"

Quì, invece di rispondeli, sò sbuttata à ride cum'è una scema, li aghju puntatu a spalla senza alcuna ritinuta, ùn mi pudia più piantà di ride...

"Ha ha, site troppu forte, Oshimo", aghju dettu, asciuvendu e lacrime di gioia chì sculavanu nant'à u mo bavellu.
In mente, avia una visione chjara di a seguita di millaie è millaie di generazione induve l'individivu, l'Ego, ùn riprisentava nunda, infine un picculu anellu persu in una catena infinita.

Oshimo, invece d'inzergassi, si messe à ride ancu più forte chè mè, si dava i colpi nantu à a coscia, vidia u mumentu chì si ne capiciuttava in l'acqua chì assaltava u scogliu : d'altronde, mi paria di cullà in furia u mare, dipoi chè no parlavamu, era cullata di 50 cm!

- Eccu, Okoko, disse Oshimo quand'ellu fù calmatu, ti puderia dà a direzzione di u mo munasteru è parte in vacanze!

Tandu a risa scema ci hà ripresu tramindui è emu risu mentre l'acqua cullava torna di 50 cm. Da quì à pocu u scogliu seria sottu à l'acqua!

Allora, era què l'Illuminazione, ùn era nunda in fatti!

- Ti sbagli Okoko, ti n'avviderai più tardi. À u to avvisu, perchè James ùn hè ghjuntu quì cun tè, chì ne pensi?

Avà era ellu chì punia e dumande! Ma ùn ebbe nisuna difficultà à risponde.

"James ùn hà compiu u so camminu. Hè sempre brusgiatu da a "Sete", a sete di a Donna. Forse ùn cumpierà mai..."

" Ma sai dinù chì...

"... hè statu sinceru cù mè, iè, a sò. M'ama cum'ellu hà amatu tutte e donne ch'ellu hà seduttu. " Avà era aldilà di a pena, di u bisognu, di u desideriu. Era cum'è di vucà nantu à un mare calmu dopu à a timpesta. Una timpesta chi averia duratu anni è anni!

Ùn aviamu mancu più bisognu di parolle. Averiamu pussutu cuntinuvà 'ssa cunversazione senza parlà. "Da u spiritu à u spiritu"...

"Hè Akinezi ch'aghju da fà parte da u munasteru. Sò sicuru ch'ellu minava troppu forte di steccu quand'è vo v'addurmintavate, nè? Vecu e muche nantu à a to spalla, u bruttu! Ùn hà capitu bè ciò ch'ellu hè u Zen, seria megliu in u mondu catolicu, chì li piace à culpabilizà a ghjente! Guarda quì !"

Vidia nantu à u scogliu cum'è nantu à un screnu : James iscia da a mo "camara" (s'ellu si pudia chjamà cusì 'ssu catagnone) è capitava à Hawa Akinezi! Quellu li fece rimproveri severi è u purtò subitu à a gara, ed eccuti à u mo principe in u trenu di u ritornu. Era triste, piinghjia ancu, mi pare. Eiu ùn pudia fà nunda per aiutallu, li tuccava à fà a so strada, ma sintia una cumpassione immensa per ellu.

- Ciò chè tù ùn sai, Okoko, u peghju, hè chì stu falzone di Akinezi hà passatu a nuttata cù l'Americana! Sta sera hà da piglià u stessu trenu chè u to James, ma ùn la facciu micca per casticallu, hè solu chì per mè un porcu pò ghjunghje più faciule à l'illuminazione chè ellu! Hè megliu ch'ellu scigliessi altre vie di "liberazione", cù l'Americana s'ellu vole.

- O Maestru, ùn m'aviate mai dettu chì u Sessu era una via pussibule ...

Quì emu risu torna una bella stonda è l'acqua hè cullata un pocu di più. Ci era una cumplicità incredibile trà noi! Mai averia imaginatu un maestru Zen cusì, cù un sensu acutu di a risa, di a macagna, di u scherzu!

- Okoko, u Zen hè l'arte di "l'Attu ghjustu", ogni attu ti pò liberà s'è tù u faci di modu "ghjustu". Hè ciò ch'ai fattu fendu l'amore cù James, senza pinsà, senza primuratti di sapè s'è tù eri "bè", sè tù facii ciò chì ci vulia, ti sì data cumplettamente, senza sperà di ritenelu cun tè (postu ch'è tù sai ch'ellu hè maritatu) è ghjè cusì chè tù ti sì liberata di tutti i nuli, vale à dì i sintimi negativi è ancu certi chì parenu pusitivi, chì impediscenu u nostru spiritu di lucicà cum'è un spechju nittatu, induve ùn ferma mancu un grombulu di pulvariccia.

Avà o Maestru ci tocca à tramutacci, nò? L'acqua ci lecca i pedi.

Iè, nunda di più faciule. Andemu !

Emu spiccatu u volu è simu mossi, à zozzò nantu à i nuli di a mussone, à mezu à tutti 'ssi bizzichilonghi ch'ùn facianu mancu più casu di noi.


"Alè! un'altra, avà bula l'Illuminata! " Marco B...ùn ne pudia più, ùn riiscia mancu più à manghjà tantu ch'ellu ridia. O Francesca, avà ci vurria à caccià un pocu di TVA à 'ssu racontu, nò?"

- Hè tuttu veru, rispose Francesca senza trubulassi.

Cio chì mi piace in veru, in sta storia, o Francesca, hè chì ci hè veramente una dimensione spirituale, disgraziamente assenta (per u mumentu) di a meia.
Senza scurdàssi ch'ell'hè interessente...

Dà quì à pocu, ci vuleria à fà una categuria speciale (podasse ch'un sughjettu novu basterà) per mette tutti i rumanzi virtuali scritti quì... di manera ininterotta.
Chì ne pinsate, voi...

In cori à l’abissi siderali (quatresima parte, Gherccebà)


Parechji ghjorni dopu, Lirl è Lughjarcu sò sempre in prighjò. Dapoi u principiu di a so incarcerazione, ùn anu scontru à nimu o quasi nimu. A carcera in a quale eranu stati chjosi, carcera ch’ùn anu micca lasciata dapoi u principiu, era cumpletamente viota, è solu e visite cutidiane di un’guardianu per purtàlli à manghjà. È dà ellu, ùn amparavanu nunda. Ùn sapianu micca quandu avianu à pudè esce di sta prighjò, è s’elli avianu à esse ghjudicati o micca. In veru, cumminciavanu à avè a paura, i dui amichi. Quelli d’Izuzzò parianu decisi di lacàlli more in prighjò. Prima, ùn avianu micca paura, postu chì firmava sempre u Vededelà cù i so amichi, pronti à vene liberàlli, mà i ghjorni passavanu, è nund’ùn si passava ; nisun’cummandò d’i so amichi venia per liberàlli. Mà più ch’è a paura, si ponianu quistione. Si dumandavanu sopra tuttu quantu tempu firmerianu incarcerati in sta carcera bughja senza lume ne spiranza, quantu tempu avianu à firmà chjosi ind’una prighjò, nant’una terra straniera. Si dumandavanu dinù perchè i rispusevuli di a so incarcerazione li lacavanu cusì senza fà nunda, senza dumandàlli nunda, è senza mancu fàlli torturà per fàlli riccunosce qualcosa, cume u capitanu di i guardii l’avia detta. Era l’ultima volta ch’elli avianu vistu u lume di fora. L’ultima volta.
A matina di u quatresimu ghjornu, Lughjarcu, diventatu amaru dopu à tant’ore di ditenzione, dichjarò, cusì, à Lirl :
“Quessi quì, s’elli abbianu avutu una piccula idea di quale sò eiu, ùn m’averia mai trattatu cusì. À ti dicu eiu !”
Lirl era un’pocu stumacatu di sente un’affare simile... Primu, perchè era a prima volta ch’ellu sentia à Lughjarcu parlà cun tanta sufficienza, ellu d’abitudine sempre mudestu, è dopu perchè venia di rendessi contu ch’ùn avia mai parlatu veramente cun ellu di u so passatu. S’è Lughjarcu cunniscia tutt’a vita di Lirl, Lirl, à contu soiu, ignuria tuttu di a vita passata di Lughjarcu. Solu sappia ch’ell’era ben’più vechju ch’è ellu, (postu ch’è i Facciuti verti campanu parechje millaie, l’avia amparatu Lughjarcu).
Lughjarcu, chì podasse avia induvinatu a pinsata di u so amicu, precisò :
“Eiu, sò unu di i guvernori di KL 16.”
Lirl, più curiosu ch’è stumacatu, si spicciò di dumandà :
“È cosa hè, KL 16 ?”
Lughjarcu, malgratu a so incarcerazione, era cuntentissimu. Era a prima volta chì Lirl li dumandava di parlà d’ellu. In fattu, era a prima volta dapoi una stonda chì qualchissia li dumandava di parlà d’ellu. Rispose :
“KL 16 hè una cità spaziale maiò maiò di parechje decine di chilometri di diametru ; iè, parlu di diametru postu ch’ell’hè tondula, sferica ; è simu, à pocu pressu, duie mille “facciuti verdi” cume vo ci chjamemu, à campà quallà. È eiu, più di vint’anni fà, sò statu elettu guvernore di sta cità ; in fattu, unu di i dece guvernori di a cità.”
Lirl, verramente interessatu dà cio ch’ellu cuntava Lughjarcu, l’incuraggì :
“Ah iè ? È cumu si passanu l’affare, quallà ?”
Lughjarcu, parendu impenseritu, rispose :
“A vita quallà, ben’chè no’n siamu povari, è ben’chè no abbiamu tuttu cio ch’ellu ci vole per vive, ùn hè micca verramente una vita... Ùn hè micca verramente una vita di firmà sempre chjosi cun quattru muri di metallu per cunfine, senz’un’altru pezzu di verdura ch’è i nostri giardini artificiali, è senza pudè campà in veru nant’una vera pianetta vera.”
Lirl, cumpatiscente, li dumandò :
“Perchè ? Pianetta, ùn n’avete ?”
Lughjarcu, chì paria più tristu, rispose cun’pena :
“Innò... Pianetta ùn ne avemu più... Tutt’u nostru populu, a nostra razza, hè raccolta in e quattru cità spaziale : KL 16, KL 22, KL 37, è KL 40. Tutte listesse, ancu sè KL 16, a meia, hè più chjuca ch’è l’altre. Ùn firma più ch’è 14 000 “Facciuti verdi” in tuttu l’universu... Simu ancu menu numarosi ch’è voi... Pianetta ùn ne avemu più... ùn avemu più, per campà, ch’è sse quattru cità artificiale.”
Dop’à avè dettu què, Lughjarcu firmò zittu, cume astracatu, anientitu. Lirl, ellu, era pensosu. Per a prima volta ch’ellu li parlava d’ellu è di u so populu, Lughjarcu discrivia un populu più disgraziatu ch’è u soiu : sè i cariutiani eranu un populu mezu sparitu spapersu dà “mare” in là, u populu di i “facciuti verdi” era veramente un’populu quasi sparitu ch’ùn avia più casa è poche sperenze. Primurosu di fà qualcosa per aiutà quellu chì l’avia tant’aiutatu, Lirl, appena cummosu dà e rivelazione di u so amicu, li dichjarò :
“S’o possu fà qualcosa per aiutà u vostru populu, dimmilà, o Lughjà... è feraghju...”
Lughjarcu, senza parè avè riflettitu, li rispose :
“Iè poi fà qualcosa... S’è tù adempii a to missione cume no’avemu dettu prima, serà propiu bè.”
È dop’à avè dettu què, Lughjarcu si tacì. Lirl era più pensosu ch’è mai. Oramai, ùn capiscia micca perchè, u fattu di compie a so missione seria un’bè per i facciuti verdi. Mà più ch’è mai, li rivenia a rabbia, è a vuluntà di vince, d’ùn firmà micca quì chjosu in una prighjò izuzzoninca, duv’ùn avia nund’à fà, in veru... Pinsava più ch’è mai à a so missione sacrata, di cuncultà tutt’i cariutiani di a diasporà per fà chì u populu cariutianu sia infine ramintatu in terra soia sott’à una sola bandera, libari di u so destinu... E li venia a rabbia, a rabbia di esce, a rabbia di riesce...
Fù precisamente à stu mumentu quì chì u guardianu rientrò in a carcera per mandàlli, cume tutt’i ghjorni, affaraccie à manghjà. Lirl, ùn vidia mancu più u guardianu, ne tutti l’altri guardi di a citadella. Ùn vidia più ch’è a porta aperta, è u curridore daretu. Si ramintava di a so forza, è di tutt’u sangue versatu dà i so antennati per pudè campà in libertà...
Allora, si discitò, è senza chì u tintu guardianu abbia u tempu di capì cio chì si passava, li sciaccò parechji pattoni fin’chì u corciu sia cascatu in terra... Allora, Lirl li pigliò e chjave, è chjamò :
“Veni, o Lughjà ! Avà, escimu !”
Lughjarcu, ben’ch’ellu fù un’pocu sorpressa dà cio chì venia d’accate, si discitò subitu subitu, cuntentu ch’ell’era, di pudè pruvà à ritruvà a libertà.
Hè cusì chì i dui amichi laccò infine a carcera bughja duv’ell’eranu, pigliendu a strada di a libertà...



Terza (è ultima) parte, dopu...

PEnsu ch'ellu serà megliu di fà cum'ellu dice Cumpà chì ci sò assai scritti avà

Cio ch'hè sicuru, hè chì ci vole à fà qualcosa per megliurà a lisibilità...

Brava, o Francesca, francamenti ti ni se surtita com'è una sperta, furtissima. Ci `hè a risa è ancu u sensu in 'ssu testu. È quiddi chì duviani finiscia in u trenu finiscini com'iddi duviani. Piccatu chì l'Americana ùn avissi cunnisciutu a stessa illuminazioni chè Okoko...

Ma, avali chì tù hai finitu, ramentu ciò ch'e' diciu in u primu missaghju di i Scritti Imposti : "Par chì i testi siini lighjittoghji dimu ch'ùn varchessini micca i quindici o vinti filari."