Eccu ciò ch'e' prupongu o Marcu Maria, pà furzacci tutti à scriva calcosa di tantu in tantu, è cussì ùn perda mai l'abitudina di crià è scrivacciulà : apra una cronaca di Scritti Imposti.

Dimu chì tutti i sittimani unu imponi un tema, un sughjettu, è una manera di pruceda, è ugnunu scrivi assolutamenti è senza tantu rifletta annantu à u tema impostu è suvitendu i reguli fissati.

Par chì i testi siini lighjittoghji dimu ch'ùn varchessini micca i quindici o vinti filari. Cummenciu eu (sì l'affari ùn viaghja micca a vidaremu prestu).

Primu sughjettu di scrittura : cuntà un racontu spavintosu in una vintina di filari. U racontu cummencia di manera ubligatoria cù a frasa "Ghjà quand'hè intrutu in a casa..."

Vi lacu par piddà deci minuti è appruntà un primu testu annantu à u sughjettu.

Eccu un'idea chì mi garba assai...e cù scritti cusì corti,nimu ùn averà scuse per ùn fà u minimu sforzu !!

Ghjà quand'è hè intrutu in a casa,u sangue currìa chì parìa una piena...U liquidu rossu fallava nant'à u scalone è a si pigliava per a tighjata,senza mai piantà...sin'à andà à fà un pozzu di morte piazza di a ghjesgia.A ghjente ci s'era addunita,cumossa da tamantu parapiglia è tene,è acciaccata da l'odore chì cullava ind'u celu scuru di a notte.
L'ispettore Cordilione a s'aspettava à campà una stonda brutta,angusciosa,ma mai ùn averebbe pinsatu di scopre quì tamantu scumpientu...A l'avianu detta chì i mughji erani tremendi,avianu affanatu tutti quelli di u paisolu d'inghjò,ma ùn si pudìa mai figurà di scopre quì quellu macellu.Ci vulìa à esse un omu rozu da pudè stassine arrittu è drittu di pettu à issu spettaculu d'infernu.I capi eranu accatastati cum'elli s'accuncianu mori di legni d'ottobre,di modu regulare è cù un ordine murtulaghju.E parsone eranu tagliate à pezzi,è brusgiavanu ind'u focu cù un sisu da fatevi batte à a larga,da davvi u laziu di vultà in daretu è corre sin'à perdenne u fiatu.Ma ellu,u mostru,era postu quì,zifulendu accantu à l'agnone,è accatizendu u focu,ogni tantu,cù un pezzu di bracciu ò una spalla d'una vittima.Ziffulava è un paria mancu surpresu di vede affacà a pulizza,ùn pruvava mancu stampa à scappà ò à pruvà qualcosa da salvà a so pelle.Quandu l'ispettore li dumandò di lasciassi chjappà,s'arrizzò,è fighjulendulu in ochji,si fece saltà u ciarbellu cù un surrisu da ghjacevvi u sangue per l'eternità...U sangue currìa di più,ma questu quì era sangue neru,ùn si mischjava micca cù quellu di e vittime;era sangue d'un omu chì sempre era statu messu da cantu,colpa di u so fisicu sfarente.A ghjente di u paese,ghjuchendulu à a risa è scantendulu da ogni stonda cummuna,l'avia trasfurmatu ind'un mostru...è oghje ind'u bughju di a notte,avia trovu l'occasione di sparghje cun elli un mumentu d'eccezzione...

A dicia bè ch'ellu ci era forse troppu prufessori avà in u foru.

QUè mi ramenta a scola è mi dà a voglia di scappà!!!

N'aghju fatta una chjuca chjuca,à l'affuria,chì mi tocca à andà per corre appena...Ne feraghju una più bella per dumane...Scialatevila sta sera...

Ghjà quandu hè intrutu in a casa, u silenziu li cascò addossu, attempu à un odore di sangue chì u pigliava pè a cannella. Quand'ellu accese u lume lentò un mughju spaventatu.

I muri, u pianu, era tuttu rossu di sangue, è quand'ellu ghjunse in a camara, vidì à Maddalè, à pusà nantu à u lettu, un cultellone di macellaru in manu, l'ochji vioti... Custì dinù ci era u sangue da partuttu, è prima pensò chì Maddalè s'era tagliatu e vene cum'è a prima volta...

Maddalè!

Si strangulava, a so voce era debbule, ùn escia nunda da a so gola.

Ella si girò ver di ellu, cù un sguardu pazzu, è sbuttò à pienghje :

O Marco!!

ùn vulia micca, ùn vulia micca...Ma ùn mi tenia più cara, ùn m'ascultava micca, ùn mi tenia più cara...

È in fine, sculunnò, daretu à u lettu, Turcu, u cane di Maddalè, un cursinu magnificu, tagliatu à pezzi...

Primu tema : « Spaventu »
Ghjà quand’hè intrutu in a casa, un odori stranu l’hà frasturnatu. Micca un odori di carrimasciu, nò, è nemmancu si pudia dì ch’idda era a morti chì si rispiraia quì, ma un odori ch’ùn l’avaria mancu pussuta imaginà. Era a prima volta ch’iddu muscaia unu stizzu paghjesu, a prima volta chì i so nadila erani uffesi à quissu puntu. Era à a lìmita di vena menu, era à l’orlu di l’agunia. Po’ ‘ssa sinsazioni cruda d’essa mali, ‘ssa sinsazioni mai vissuta chì calcosa di scunnisciutu, d’indicìbuli, l’agrissaia…
Hà avanzatu quantunca, s’hè datu di curaghju, po’ mancu si pò dì ch’iddu ci riflittia sempri, era u so distinu cussì, dipoi ch’iddu avia ricivutu ‘ssa tilifunata era spiritatu, a sapia ch’ùn pudia più rinculà. Allora hà bucatu una porta, hà visitatu i pezzi di u casamentu. I mòbuli inchiitanti cù i formi vechji, i formi strani zuccati cù i farri bàrbari d’un antru tempu, l’ànguli impinsèvuli di i mura, l’accunciamentu sprupusitatu di i petri, scalpillinati à usu spavintosu da calchì mani schifizzosa… tuttu quì l’era numicu è priculosu, tuttu l’affucaia, a casa intreva paria d’aguantallu.
Hà avanzatu, ma una baracina insuppurtèvuli l’acciaccaia, è ghjà era guasgi à pienghja, com’è un cundannatu à u suppliziu, è infini s’hè trovu in ‘ssu curridori, è ùn c’era guasgi più visibilità, è l’odori si facia avali più forti mentri ch’iddu s’avvicinaia da a catarazza.
Allora si hè intesu com’è un scemu, ùn s’hè micca pussutu impidì d’agiscia, di manera micànica, com’è suttu à u cuntrollu stessu di st’odori infamu, è s’hè vistu tirà annantu à a manìchjula, s’hè vistu apra ‘ssa catarazza, è u tempu d’un ètimu, u tempu d’una stundaredda, hà capitu chì a casa di a stria u s’avia da manghjà, è ch’iddu vinia d’apra, micca una sìmplicia catarazza, ma una porta, versu induva ? Induva ?... T’avaria l’eternità par sapella, l’eternità pà sòffrala.

Ah ! Ah ! Ah ! Magnificu !

O Francesca, ha fattu bè d'ùn iscappà micca !

Ghjè quandu sò intrutu in a casa chì aghju vistu un assembru:
Davantà à mè, una smorfia, un ammostru ...
Un assumiddava à nudda, era trà u cani è a ghjaddina,..
A so bocca era un bizzicu mai cun denti tagliuti è erani pieni di sangui...
I so pedi erani palmulati, i so ochji erani virdogni, a so peddi era cuparta di piumi, avia un coddu longu longu, è l'animalacciu faciani da veru a pauraccia...
Mi sò missu à tardaviddà è ùn pudia fà piantà stu tremulu ...
Sò sciutu fora è tandu, davant'à i me ochji, sburlati, aghju vistu tutti i ghjaddini di u puddinaghju, tutti i me ghjacari di caccia, tutti scanniddati, à lingua di fora...

Iè ma u me racontu hè curtissimu, sì ...ma ci pò essa una seguita ...

ma dumani... pò essa, vidaremu, ... sì Diu voli ..!
S'è ùn mi facciu micca sbrumà da l'ammostru canighjaddina...

ghjà quandu sò intruta in casa....sgucciulaia sgucciulaia spiriaia 'ss'ochju spalancatu chi anch'iddu sciaccanaia sciaccanaia.......pà sciappà quidda sciringa sciaccanaia sciaccanaia..........ma mai ùn stanciaia.....eccu u filu d'una vita chi à caternu si ni và....si ni và.........è pà quissa bastarani cinqui filaracci (scusaià o Capità )

Ci vulerebbe chì Eiustessu,So,Erbaghju,GFedericcu è l'altri ci fessinu qualcosa dinù

E ancu tù o Zinzala maladetta