Bella !

Ecc'una risposta bennissima...

Bravu, o Marcu Marì...
Era à pocu pressu cio ch'aspettavu eiu.
Sò cuntentissimu di sta risposta...


Bon, avà, ùn'mi ferma più ch'è à truvà cosa s'hà dà passà dopu.

Aghju ingasgiatu u famosu dettettivu privatu Orsu Dumenicu Solechjari, u più gran'dettettivu di Corsica... Cridete ch'ellu puderà fà qualcosa, contr'à Lernazg ?

Aghju trovu qualchi ritratti di Lernazg pigliendussi cazzotti dà Marcu Maria.
Per una volta, l'autoproclamatu "maestru di u bughju" si trova à terra

















Avà, iè chì firmerà zittu, stu satanassu di carnavale (cum'ella dice Francesca).

Fù bè cusì ch'ellu s'hè passatu, o Marcu Marì ?
Ste fiure, sò ben'quelle di a cazzutata contr'à Lernazg ?

(Ti dumandu què perchè aghju vistu ch'è tù eri prisente nant'à u foru ?)

Aghj'à scrive a seguita.
Mi lampu oghje.



Pusatu daret’à u so scagnu, in u so uffiziu, stallatu carrughju Matteu Mattei, in pien’centru di a cità di Corti, Orsu Dumenicu Solechjari, u più gran’dettetivu privatu di tutta a Corsica aspettava un’eventuale cliente, navigantu nant’à Internet. Ben’ch’assai ghjovannu, l’omu era nustalgicu dà veru, dà i tempi andati, ch’ell’ùn apia mancu cunnisciutu. In i tempi, l’omi, ùn avianu u tempu d’annuiàssi, chì ci era sempre qualcos’à fà, trà e tribbiere, e racolte, e battute à u cignale, a pesca, è tant’è tant’altr’attività… A caccia è a pesca si praticanu sempre, mà sò diventate uccupazione più ch’è necessità campatoghje… è almenu, in i tempi, ci era a fraternità vera, micca cume oghje.
In i tempi, l’omi eranu forti, è micca adebuliti dà à sucetà è u sangue carcu di puliclurubifènolu. In i tempi, tutt’ognunu sapia parlà corsu, è micca cume oghje.
Indipendentistu, Solechjari l’era dà veru. Natu, disgraziamente per ellu, un’nove di maghju (precisamente, di l’anu 1969), Solechjari era un’veru patriottu di a causa corsa. Innamuratu di a so terra, a so Corsica, vulia l’indipendenza, almenu per pudè sperà un’ritornu di i veri valori di l’Anima Corsa a più prufonda. In i stessi tempi, Solechjari era dinù un’omu chì vulia participà à u mantenimentu di l’ordine è à a prutezzione di l’umani. In Solechjari, c’era dà veru, un’odiu veritabile contr’à tuttu cio chì s’assumigliava, dà vicinu o dà luntanu, à una maffia, u peghju castigu di a Corsica attuale, dop’à a presenza culuniale, ch’ellu ci vulia eradicà. Per quessa, per a difesa di l’omu corsu contr’à ogni forma di criminalità è di male, era diventatu dettettivu privatu. Seria ancu entratu in a puliza s’ell’ùn era micca dighjà indipendantistu Solechjari, chì a puliza chì si vede in Corsica, ùn riprisenta ch’è una forza d’occupazione contr’à u patriotisimu corsu ; mà, l’avia ghjuratu : quandu a Corsica diventerà indipendante, ellu, serà à u capu di a puliza corsa, per pudè cuntinuà à cumbatte a criminalità.
Per quessa era diventatu dettettivu, Solechjari. S’era stallatu in Corti, capitale di a Corsica Indipendante, è avia trovu un’uffiziu micca troppu puzzicosu, in u quale s’era stallatu. S’era abituatu assai prestu à u so mistieru di dettettivu privatu, pigliendusi quasi per Humphrey Bogart, di u Falcu Maltese, è u Gran’Sonniu.
D’altronde, u so uffiziu s’assumigliava, dà veru, à un’uffiziu tipicu ch’ùn si scontra ch’è in i vechji filmi americani di l’anni quaranta. Anc’ellu, incù u so mantellone, è a so faccia d’omu stuccu chì hà vistu tant’è’tant’affare in a so vita, evucava appinucia un’Marlowe di sinemà. Era cusì Solechjari, un pocu monta sega.
Dopu à a so stallazione cume dettettivu privatu, Solechjari era firmatu parechji ghjorni senza nisun’cliente : nim’ùn sapia nunda di a so esistenza. Hà pinsatu qualchi tempu fà una publicità nant’à Corse Matin, mà pinsava chì avia dà perde u so onore s’ellu facia què. Per quessa, è per fàssi cunnosce, hè statu ubligatu di passà in tutte e fiere di a Corsica, stallendu u so stand in ogni locu, sperendu di fà cunniscenze di cliente putenziali. Mà in fattu, nund’ùn venia ; peghju : tutti quelli chì passavanu davant’à ellu, sopra tuttu d’estate, si ne ridianu di u so longu mantellu chì devia esse troppu caldu per a staghjone…
Per quessa, Solechjari, ùn avia ch’è pochi clienti, in u principiu… Mà, in fattu, cume a Corsica hè chjuca, è chì tutt’u mondu cunnosce à tutt’u mondu, Solechjari hà finitu per diventà quasi cunnisciutu, ancu s’è certi cuntinuavanu à scherzàllu.
L’affari chì l’avia incurunatu di successu era venutu trè anni dopu à a so stallazione, quandu era statu cuntattatu dà un’rispusevule naziunalistu cunnisciutu, Ghjuvannu Filangrocca, per pudè identificà l’autore di e lettere di minaccie ch’ellu ricevia cutidianmente. Solechjari avia riesciutu à truvà stu malasciamè, in fattu un’ghjendarmu, è cusì, era diventatu una celebrità in tutta a Corsica, participentu di colpu, à fà avanzà a causa, chì l’affari avia fattu gran’rimore.

Fù cusì chì, quasi cinqu’anni dop’à a so stallazione, allora ch’ell’era daret’à u so scagnu aspettendu client, navigandu nant’à Internet, è più particulariamente, nant’à u Foru Corsu, Solechjari audì qualchissia chì pichjava à a so porta. Podasse un’cliente, si disse.

Solechjari lampò :
« Pudete entre. »
È cusì, entrò una spezia di ghjuvanottu, assai cortu, chì riescia à esse è largu, è magru, a pella bianca cume un’mortu, è vagamente biondu. U tipu s’assumigliava à pena à un’scemu…
« Site bè Orsu Dumenicu Solechjari ? » Dumandò u « cliente putenziale »
Solechjari, pocu paciente, rispose :
« È qual’aghj’à esse ? Si scemu o chè ? Èppò quale sì, tù ? »
Era quessa a manera di travaglià di Solechjari : per ellu, ci vulia esse seccu : a sola manera d’ottene risultati :
« Ùn vi dicu micca u mio veru nome, mà pudetemmi chjamà Cumpà ; aghju bisognu di voi. »
Cosa hè stu scemu, si dumandava Solechjari. Cumpà ? Cosa serà, sta manera d’ùn palisà micca u so veru nome ? Li ramentava, parechji mesi fà, un’affare duve un’cliente s’era prisentatu sott’à u cugnome di EiuStessu. Mà, in fattu, cumminciava à dìssi chì podasse chì scemu ùn era micca, u ghjovanu « cumpà ». È per quessa li dumandò :
« Ai sai quale sò eiu ? Sò u più gran’dettettivu privatu di tutta a Corsica. Tutt’u mondu mi chjama per ingasgiàmmi. Mi pare chì t’aghju dighjà vistu in una manifestazione per a lingua corsa… almenu ch’ella fussi una manifestazione per i prighjunneri… Di tutte manere, sò cuntentu di vede chì ancu i ghjovanni s’investiscenu in a Lotta di Liberazione Naziunale… Cosa possu fà per tè ? »
Fù cusì chì Cumpà li cuntò cumu Ghjacumu’Francescu Ferletti avia vindicatu a so surella, cumu Gregoriu Pulsametti l’avia circatu dapertuttu è chì Ghjacumu’Francescu si n’era fughjitu, cumu ùn avia più avutu nutizie di Ghjacumu Francescu, è infine, cum’ellu avia scontru un’persunaghju inquietante : Lernazg.
Solechjari stavava à sente, dumandendussi s’ell’era vera tutta sta storia. Di sicuru, avia intesu parlà di l’affare Ferletti, quandu Ghjacumu’Francescu Ferletti, di u paese di Nivrasi, avia tombu un’certu Pulsametti, di u stessu paese, chì avia viulatu a so surella. Sapia dinù chì Ferletti avia pigliatu a machja, è chì a puliza ùn l’avia micca ritrovu.
Mà stu puttachju quì, cuncernendu stu straniu Lernazg, li paria dà veru, incredivule. Mà ci era qualcusella, in a so cuscenza prufessiunale, chì li dicia ch’ùn era micca cusì scema a storia, è chì podasse seria l’inquiesta a più bella di a so carriera.
Fù cusì chì Solechjari accitò d’inquiestà nant’à a smariscione di Ferletti, è nant’à stu straniu Lernazg.
Fù cusì chì tuttu principiò.

Ùn t'inquieta micca o Cumpà, l'aghju dà chjappà, stu Lernazg.
Ùn sò u più brigliante dettettivu di Corsica ?