O Balanì, voli scrive a to testimonianza di a to scontra incù u dettettivu Solechjari ?
Chì ne pensi ?

Allora ?
Quale hè chì vole esse u testimone ?
Quale hè chì vole scrive cio ch'ell'hà vistu stu ghjornu quì in Aghjacciu, trà Lernazg è Ferletti ?
Quale serà u testimone chì Solechjari interugherà ?

À mumenti, aghju dà liberà Ferletti è Bodol.
In u prossimu stalvatoghju.

10

Facianu più di trè mesi chì Ghjacumu-Francescu Ferletti era prighjuneru in sta cità persa à mezu à u Sprufondu. Sta cità moltu strania in a quale ùn piuvia mai. Trè mesi ! Trè mesi di suffrenze cutidiane fatte dà quellu chì si dicia u maestru di u bughju, incù friddura tamanta è sempre cuntintezza altiera. Durante tutta la so vita, Ghjacumu-Francescu aviu, ben’intesu, vistu parechje volte, omi viulente ; mà avia rimarcatu chì quandu l’omi eranu viulente, eranu sempre in zerga prufonda, o podasse in sborgna. Mà era propiu a prima volta ch’ellu vidia qualchissia fà usu di a viulenza incù un’calmu cusì pienu, è un’piacè immensu, chì, ancu s’e Lernazg firmava sempre sobriu in l’espressione di i so sintimi, Ghjacumu-Francescu era più ch’è sicuru chì a suffrenza di l’altri incantava Lernazg. Iè, dà veru, st’omu era u Diavulu !
Trè mesi chì Ghjacumu-Francescu era prighjuneru di u Diavulu. È e suffrenze ch’ellu li impunia eranu sempre abuminevule è rinnuvate. Lernazg, incù i so ditti cusì fini, era propiu un’specialistu per fà soffre a ghjente u più ch’ell’era pussibulu senza tumbàlli, è in stu dumaniu, era immensa a so imaghjinazione, s’è almenu a parolla « imaghjinazione » era cunvenevule per parlà di a pinsata di u Diavulu !
Trè mesi di suffrenze tamente è d’addisperu cusì grande. Trè mesi infiniti. Senza parlà di a so suffrenza fisica, ci era dinù a so suffrenza mentale d’esse prighjuneru di u Diavulu. Podasse ancu per u sempre, per l’eternità. Lernazg ùn l’avia micca precisatu, mà li paria chì a so dannazione seria eterna. Li paria chì u so destinu seria di duvintà cume li schjavi stupidi è scerbellati chì ghjuvavanu d’armata à Lernazg. Più ch’è mai, pinsava ch’è a vita era cume un’fiume di spirenze ch’ùn ponu andà à u mare è ch’ellu ci vulia accittà u destinu ancu s’ell’era crudellu. Più ch’è mai, capiscia u senza di a canzona « Barbara Furtuna ».

Mà tutti li ghjorni ùn eranu micca listessi, chì Lernazg ùn era micca sempre prisente. Certe volte, si n’andava di a cità, podasse per andà à circà altre vittime, è sti ghjorni eranu un’pocu più dolce, chì i soli supplizii chì li eranu imposti venianu di i servitori stupidi di Lernazg ch’ùn facianu ch’è ubbidisce à l’ordine suprani venendu à Lernazg, è dunque, eranu più mecànichi ch’è veramente perversi, cum’ell’era u maestru.

U solu puntu pusitivu era a so amicizia incù Bodol. St’omu, chì avia pruvatu à tumbàllu per attarzàllu suffrenze ben’peghje, era a sola personna cun’a quale pudia parlà veramente. Mà ancu e cunversazione trà elli si facianu à l’appiattu di Lernazg chì risicava di capì chì Bodol ùn era micca scerbellatu. Per quessa, ùn pudianu micca parlàssi tantu.
È quand’elli parlavanu, parlavanu quasi sempre di e perspettive di scappera. Certe, eranu sott’à a duminazione di u Diavulu, mà dannati, ùn eranu micca, postu chì eranu in un locu esistente, un locu terrestru, è micca in l’infernu bughju, veritabile imperu di Lernazg, in u quale si truvava u so Tronu Umbrosu dà u quale parlava sempre. Per quessa, eranu tutti i dui cunvinti ch’una scappera era pussibile, ancu s’ell’era difficiule. I guardi, ancu s’ell’eranu scerbellati, eranu propiu numarosi, è quandu Lernazg era presente, a so onniscenza era tale chì ogni prova di scappera era propiu impussibile. Mà in l’assenza di Lernazg, a sperenza d’una scappera esistia dà veru, ancu s’ell’era chjuca. Per quessa, aspettavanu sempre l’assenze di Lernazg cume u più bellu rigalu chì u celu pudia fàlli.
Ghjacumu-Francescu ùn avia mai persu cumplettamente a sperenza, dapoi ch’ell’avia fattu cunniscenza incù Bodol. Certe era in una situazione tale chì certe volte, si dicia ch’ell’averia preferitu a morte, mà era sempre in vita, è Bodol era a prova ch’ell’era pussibile di resiste à e turture è i supplizii ch’ellu appiccicava Lernazg. È di colpu, a scappera firmava pussibile, in l’assenze di Lernazg.


U fattu hè chì, quasi trè mesi dopu à a so ghjunta in stu locu maladettu, mà quantunque terrestru, Ghjacumu-Francescu truvò infine a porta aperta di u so destinu.
Stu ghjornu precisu, Lernazg s’era assentatu, probabilmente per andà à circà d’altre vittime, è fora di Ghjacumu-Francescu è di Bodol, ùn ci era più nisun’intelligenza in tutta la cità. L’occasione sunniata per fughje. Certe, ùn era micca a prima volta chì Lernazg era assentu, mà sta volta quì, ci era un’fattore di più ch’è d’abitutine in favore d’una scappera, chì era chì Lernazg avia cumpratu una vittua nova, ancu più bella ch’è l’anziana. Certe, era partutu cù a so vittura nova, cundutta, ben’intesu, per un’cunduttore schjavu, chì Lernazg ùn cunducia mai, mà almenu avia lasciatu a vechja in cità, sot’à a guardia di qualchi schjavi scerbellati. L’occasione sunniata, dà veru.
Mà ci vulia fà in furia, chì nun si sapia micca quandu avia dà rientre Lernazg, è dinù ch’un occasione simile ùn si riprisenteria più.

A matina, Ghjacumu-Francescu riescì à parlà à Bodol senza fàssi vede dà i schjavi stupidi di Lernazg. Secondu à cio ch’ellu avia intesu dì, dà Lernazg ellu stessu, avia servitori più intelligenti è più crudelli in u so imperu veru, quellu chì si chjamava Infernu. Quellu dà u quale nim’ùn pudia fughje. Quellu induve smariscianu tutti quelli chì avianu l’anima troppu scura per firmà quì sott’à u celu. U locu dà u quale u pueta talianu Dante avia scrittu : « Voi chì entrate quì perdate ogni sperenza. »
Mà in fattu, i soli servitori chì campavanu in stu locu persu ben’chè terrestru eranu schjavi stupidi, è ùn devianu micca esse troppu numarosi, è di colpu, paria faciule di vincelli. U ghjocu di i schjavi era minutatu di manera propiu precisa à tal’puntu chì ogni attu di a vita di sta cità era propiu previdibile, per quellu chì aviu usservatu incù attenzione tuttu cio chì si facia, è Bodol, fendu nice d’esse diventatu anc’ellu scerbellatu, avia riesciutu à cunnosce per core tutti l’atti d’ognunu. Cusì era sicuru chì a scappera seria riesciuta. Ferletti, chì cunniscia a mecànica, pinsava esse capace di fà viaghjà a vechja vittura di Lernazg ancu senza chjave di cuntattu. U solu prublemu seria l’essenza, chì ùn avianu micca suluzione di rimpiazzamente s’ell’ùn ci n’era micca.

Qualche ore dopu à stu cuntrastu trà i dui amichi, u pianu pudia principià.
Allora chì Ghjacumu-Francescu era cunduttu dà a so cellula fin’à u bastimentu duve devia esse suppliziatu una volta di più, per un’schjavu, era previstu ch’ellu passessi à menu di trè centu metri di a vittura, chì per l’occasione era survegliata dà solu dece guardi, trà i quali Bodol. Ùn si pudia prisentà più bella occasione.
Cusì, à un’mumentu precisu, Ghjacumu-Francescu lampò un’cazzottu in’un locu ben sceltu à u guardu chì si tenia à a so manca, è pò un’altru, simile, per quellu chì era à a so dritta. I dui guardi sì piegonu di dulore è Ghjacumu-Francescu compiò incù un’colpu in a gola à ognunu.
Frà tempu, Bodol, incù colpi forti è precisi, avia sturdulatu u guardu chì si truvava à a so dritta, è pò l’altri chì eranu venuti à a riscossa.
Vedendu chì Bodol riescia, Ghjacumu-Francescu piantò di pichjà i so dui surveglianti, è si n’andò, currendu cum’un scemu, à raghjunghjellu.
Avianu tramindui riesciutu à avvicinàssi di a vittura. Mà ùn era compia a scappera. Ci vulia fà viaghjà.
Cume Bodol avia sbundàtu una purtiera di a vittura, Ghjacumu-Francescu pudi entre senza difficultà in a vittura. Cusì, pudi, rilegandu i fili sottu à u vulante, fà staccà a vittura. Un’ràpidu colpu d’ochje à u nivellu d’essenza l’assicurò chì u pienu era quasi fattu, è chì pudianu cuntinuà cusì centinaie di chilometri. Eranu furtunati, era eccessiunale. Ci vulia prufitànne.


Pensu prisintàvvi a seguita dà quì à pocu

Micca troppu culpe per avà ?

A chi puntu è a notte?

A sai maestru di u bugju?

Eiu mi ne vo sotta a sole, a spassighjà per i mio sciali

O Belzebù, padrone di l'inferni

Ci hai a ragiò. U bugju ellu si è impoSSSSSatu di i nostri lumi...

E avale cume faraghju a face coce a minestra, a u bughju? A sai tu, o gran maestru?

Eccu ! Aghju infine finitu di scrive u decesimu capitulu di a storia "Solechjari contr'à Lernazg"
Infine aghju riesciutu à fà scappà Ferletti è Bodol di a cità-prighjò di Lernazg. Era ora, sò stati castigati à bastanza.
Per avà, ùn aghju più idee per cio ch'aghju dà invità per a seguita di a storia (imagine cume aghju da fà per fà ch'elli fussini ritrovi dà Solechjari), è in più di què, Solechjari ha pigliatu a machja è m'hà lasciatu solu per imaginà tuttu què.

Allora aghju dà piantà una cria sta storia. Podasse ch'aghju dà ripiglià quessa, ch'ùn aghju mai finitu, nant'à Lirl "Leggenda di Lirl l'Errante", chì quessa, a sò cum'ella s'hà dà compie.

Mà per avà, sol'una quistione : ùn ci sò micca troppu sbagli urtugrafichi, in stu decesimu capitulu ?

ci ne serà qualchi unu ma a ti ti diceranu i prufessori . solu pè a cunghjucazione :
gf fece
un ebbe
appughjò
gf vide
ghjunsenu