U piscadore è u mazzeru...

MARCU MARIA · GOLU Nombre de messages: 7209 Date d'inscription: 21/10/2004

U piscadore è u mazzeru

Tocca aprile in paese d’Auccià è à Ghjuvà, face un bellu pezzu chì li trica d’andà à piscà per ‘sse muntagne di a Punta d’Isa è u Tirulellu. A dumenica da mane, sò cinque ore quand’ellu s’arrizza, pruvendu à un sveglià a so moglia addurmintata accantu à ellu è pigliendu u tempu di rimiralla una cria ch’ella pare tuttu un anghjulu….A passi pullitrini, fala in cucina à pigliassi un caffè cù dui canistrelli ;u tempu di scitassi da veru, chì ci serà vulsutu a passione per smatinà cusi à bon’ora, mentre ch’ellu travaglia a settimana sana per stantà u so pane ! Ma e pescie di u Pinzolu li frasturnavanu u ciarbellu dipoi ch’ellu era vultatu scozzulu scozzulu, di marzu scorsu, fendusi ghjucà à a risa da tutti i vechjetti di u paese. Allora oghje ùn ci serà nisun’ pietà per e truite ! seranu tutte ind’a so musetta da quì à sta sera è puderà francà capu altu è fieru u carrughju cù a so prisacca piena à tappu. A piscaghjola l’aspetta nantu à u terrazzolu è eccu ch’ellu a si piglia per a funtana di u Pughjolu , à l’entre di u castagnetu per capità sinu à u munticellu chì strapiumba u fiumicellu. Quì,pianta una stundarella, vulendu godesi di a bellezza di sti lochi muntagnoli, quand’è l’ultimi ragi di a luna li danu ‘ssu culore attempu maravigliosu è misteriosu…

Ma eccu chì li pare di vede un omu appena più inghjò, piattu trà albitri è scope à orlu di fiume…À l’ascosu, fendu casu d’ùn scruchjà per ùn fassi rimarcà, s’avvicina un suppulu per circà à sapè ciò ch’ellu face quellu scrianzatu vicinu à u ghjargalu induv’ellu cuntava di piscà dipoi un pezzu ! U paisanu era impustatu, incù u so fucile è paria d’esse prontu à sparà ! Ma chì ferà pò questu quì à caccighjà d’aprile ? chì a caccia un hè ancu aperta ! Un averà tantu asgiu à pinsacci chì u trostu tremendu di e tartane u face trasaltà ! ò chì paura ch’ellu hà avutu chì era per penciulà. L’ochji avà sò aperti è bè, è l’omu a si piglia franchendu u fiumicellu per andà sin’à a bestia, stracquata ind’a fanga, morta vulendu cacciassi a sete cum’è di solitu. U cacciadore s’avvicina, è s’inghjinochja per assicurassi chì u colpu era fatale, è mentre ch’ellu face vultà u capu di u cignale, u so rugnu piglia l’apparenza di un visu umanu !!

Ghjuvà ferma intrunatu, u so core mette à pichjà da falli schjattà u pettu è si ne diventa biancu cum’è un cadaveru…chì li pare di ricunnosce u so cuginu di terzu ch’ellu tene quant’è un fratellu ! Scappa à tronchera di collu sin’à u paese è si lampa subitu ind’u so lettu. À l’agrottu vicinu à a so amica, cerca di riscaldassi chì trimuleghja quant’è u trinichellu è ch’ella li vene ancu a frebba. Appiccicatu cum’è un zitellu,è rassirinatu da quellu prufume d’amore, chjode l’ochji è s’addurmenta una stundarella.

Svegliatu da a moglia pocu tempu dopu, si dumanda s’ellu ùn hà micca fattu un gattivu sonniu ;fala in cucina è s’avvede ch’ellu hà lasciatu sopra locu a piscaghjola è tutta a so robba accunciata da passà una ghujurnata sana in muntagna ;ma li vene male à ricullà per ‘ssi lochi ! A so primura oghje hè di sapè sè u so cuginu hè in salute ! chì ciò chì hè successu li dà assai pinseri ! A cunnuscia ellu a storia di i mazzeri, a legenda piuttostu chì ùn ne cridia mancu stampa. Ma oghje, ciò ch’ellu hà vistu, o ciò ch’ellu pensa d’avè vistu, mancu ellu ùn a saperà dì, li hà arricatu un affannu maiò !! L’angustia nata da ‘ssa notte un hè per stancià, è ùn puderà stà senza sapè sè u so cuginu hè sempre vivu. Subitu prova à chjamallu ma ùn ci hè l’arte di pudelli parlà ;cresce l’angoscia da dalli a capaghjina. Impenseritu persu, atteppa sinu à a Costa in casa di u so ziu da dumandalli nutizie ; Petru era partutu incù i so amichi da scialassila una settimana in Patagunia ! cusì serà bellu luntanu di u paese è di a sorte ch’ellu li vulìa lampà quellu mazzeru crudelu ! cusì a si pinsava, Ghjuvà, cuntentu cum’un pichju è prontu avà à vultà à u Pinzolu da racoglie i so affari…Di piscà ùn hà più laziu oghje ma ùn aspetterà tantu à rivene chì a sà ancu troppu , anu da falà e macagne sta sera !!

Ma quand’ellu chjama u destinu, ùn ci hè forza chì u pari è dui ghjorni dopu, una nutizia spaventosa vene à acciaccà u paese ! Petru è i so amichi eranu smariti ind’una falanga in muntagna ! ùn ci era statu mancu versu à ritruvalli i curciarelli ;chì spaventu ! Ghjuvà,chì era ingrandatu cù u so cuginu, era scunsulatu, addisperatu, ùn vulia mancu più parlà ! Li venianu à mente quelle stonde zitelline, quand’elli cullavanu à piscà vicinu à l’anticu paese di a Mariaghja, chì era Petru chì li avia trasmessi ‘ssa passione ; si ramintava dinù quelle feste in paese toccu sittembre, quand’è incù l’amichi a si passavanu ore sane à beie è à cantà… U ghjornu di l’intarru, sè pudemu parlà cusi, u paese sanu era unitu daretu à a famiglia tocca da a strage ;eranu vinute e famiglie d’ogni paisolu è a chjesa ùn pudia lascià entre à tutti da sparte a pena di i genitori addulurati. Ghjuvà ùn a facia à ritene e so lacrime è pienghjia à un più pudè, sopra tuttu quand’elli s’alzavanu i canti in San Antuninu, da davvi a carne ghjallinina ancu per ùn cunnosce a vittima…Ma ciò chì u scumudava u più era di vede qui, à mezu à ‘ssa ghjente afflita, l’omu chì avia tombu u cignale ‘ssu ghjornu funestu ;era un paisanu di u Crucoli, un paisolu appena scantatu ;avia i so sessanti anni è un passava micca per un omu gattivu…Pocu li impreme à Ghjuvà ;sè u so cuginu , u so fratellu era mortu, era colpa di ‘ssu mostru è vulia ch’ellu sia casticatu ! A rivincinta si ferà è nunda, è nimu ùn puderà impediscelu di vindicà à Petru !! Avia asgiu à ramintassi ciò ch’ellu avia amparatu nant’à i mazzeri, ch’elli ùn eranu micca culpevuli, ch’elli ùn eranu mancu cuscenti di fà u male ;ci vulìa à tutti i patti chì u tumbatore fussi culpitu ! l’odiu era crisciutu ind’u so core di modu tremendu, ùn pudia più rifrenà e so pulzione murtulaghje…Ellu chì ùn avia mai vulsutu male à nisunu era prontu à fà corre u sangue…

Sò parechji ghjorni chì Ghjuvà aspetta u so nemicu, impustatu da sopra à u Pinzolu, piattu cum’è una volpa ;ogni notte ci volta incù u fucile ch’ellu hà imprestatu à babbò, ogni luna aspetta di vede affacà quellu chì, per ellu, era rispunsevule di a morte di Petru ! Ad un trattu, ecculu chì ghjunghje à mettesi à l’agrottu sottu à un castagnu maiò, vicinu à a vadina…Aspetterà per pudè tumbà una volta di più ? Ghjuvà ùn lu lascierà fà ! n’averà fattu ancu troppu ! Senza avè mai amparatu à maneghjà i fucili, ecculu chì spara è li ficca una palla in core…Ind’un mughju spavintosu l’omu casca da u so appullatoghju è trabulica sin’à u guadellu ; u so sangue neru chì pare inchjostru scorre da a ferita sinu à annirisce i pozzi l’unu apressu à l’altru…Ind’u bughju di a notte pagna, a morte vene à ingutuppà u locu di u so velu oscuru. Ùn si sente un zittu, ancu u spiscinime di l’acqua ùn accarezza più e so arechje ;u tempu pare firmatu !!! Averà vintu Ghjuvà ? Vole essene sicuru è s’avvicina da a so vittima, guasi sinu à tuccallu ;l’omu hè longu distesu, a chjocca in l’acqua nera chì ùn si vidia mancu u so voltu…Puderebbe parte avà Ghjuvà, a morte di Petru era vindicata, ma andate à sapè ciò chì u punta à fermà quì, impalaficatu, à a mutesca . Ùn vole vultassine senza vede un 'ultima volta a faccia di u mazzeru...Ind’un silenziu angusciosu, trimulendu è ghjacciatu da l’ambiente funestu, face girà lu so capu,pianu pianu…sinu à accorghjesi chì u visu di a vittima…hè u soiu… !!!!

_________________
Un populu,una lingua,un foru !!

erbaghju · Bucugnanu & Marignana Nombre de messages: 2094 Date d'inscription: 10/10/2006

OOO CHI BELLEZZA!!!!!!
O MM m'hai campu da veru!

francesca

sò mumenti cusì chì rendenu issu foru preziosu...

Ghjaccia u sangue issa storia colors

,...ancu s'e ùn ci credu à i mazzeri, cum'è Ghjuvà à l'iniziu...
un'antra, un'antra!

thumleft

_________________
Tibè libaru
http://www.myspace.com/francescamar

MARCU MARIA · GOLU Nombre de messages: 7209 Date d'inscription: 21/10/2004

francesca a écrit:

un'antra, un'antra!
thumleft

Ci docu capu... study

_________________
Un populu,una lingua,un foru !!

eiuSTeSSu [FLMM]

magnifica a to storia, mi sò campu !

_________________

http://www.paese-di-marignana.fr
http://lingua.corsa.free.fr
http://langue.corse.free.fr
http://corsu.dall.italiano.free.fr

MARCU MARIA · GOLU Nombre de messages: 7209 Date d'inscription: 21/10/2004

Un hà mancu lettu Ghjuvan Vitu,a l'avia detta chi cu tutte 'sse buttiglie di vinu,un eramu per vedelu Mr. Green

_________________
Un populu,una lingua,un foru !!

francesca

Mì hè vera ch'ùn si vede più à Ghjuvan Vitu nantu à u foru Shocked

Ma in quantu à e buttiglie, ci hà fattu capì qual'hè chì e spachjava... Twisted Evil

Hè vera dinù chì ùn l'avemu annigatu cù e fole ch'ellu dumandava I don't want that

_________________
Tibè libaru
http://www.myspace.com/francescamar

MARCU MARIA · GOLU Nombre de messages: 7209 Date d'inscription: 21/10/2004

O Ghjuvan Micheli, tù chì cunnosci i mazzeri, mi poi dì s'ella "tene arritta " a mo storia ? Wink

_________________
Un populu,una lingua,un foru !!

Ghjuvan Micheli

A sai, mazzeru ni cunnoscu unu solu. Forsi certi ani adupratu u fucili da tumbà a vittima mandata da l'insù. A storia di u visu ind'u grugnu cignalinu, à eddu ùn l'hè mancu accadutu una volta. Ma in Cruculi, sò ghjenti stragni

!

A to storia hè bedda è t'aghju poca primura ch'edda fussi pussibuli o nò.
Hè vera ch'eddi si ritrovani quì certi cosi detti o scritti da autori ch'ùn cunnoscini mazzeri. L'aghju dettu, ripigliani trà di eddi ciò chì unu hà scrittu nanzu (induva l'avara amparata ?).

Ci hè tuttu un mondu à scopra... un mondu insù. Ciò ch'hè sicura, hè chì tuttu ugnunu l'hà da cunnoscia un ghjornu... o una notti.

_________________
A raghjoni hè toia... ma a capra hè mea !

http://casa-di-a-memoria.over-blog.com/

MARCU MARIA · GOLU Nombre de messages: 7209 Date d'inscription: 21/10/2004

E tù a ci poi spiegà ?

O forse l'ai fatta ind'è u to scrittu chì sò ancu à leghjelu... What a Face

_________________
Un populu,una lingua,un foru !!

rappallinu

Bella, bella !

MARCU MARIA · GOLU Nombre de messages: 7209 Date d'inscription: 21/10/2004

Bella quant'è u to rumanzu ùn pò esse, ma vinendu da tè l'incuragimentu face prò Wink

_________________
Un populu,una lingua,un foru !!

rappallinu

Eiu ci avria vistu un'antra fine à a to storia...

MARCU MARIA · GOLU Nombre de messages: 7209 Date d'inscription: 21/10/2004

U pudemu cuntinuà inseme s'è tù voli... Wink

_________________
Un populu,una lingua,un foru !!

rappallinu

Perchè micca