I

Una notte calda d’istate falavanu trè o quattru giovani à ritruvà l’altri. Andavanu ind’un locu scantatu di u paese di Marignana, da a banda d’Evisa. Forse trè centu metri in là da u campusantu, si suvitava u stradò è si ghjunghjia à un muru, appuntu numinatu « u Murettu », à vicin'à à a Crughjichja, è quallà si passavanu e siratine sane, è par certi forse ancu e nuttate.
Ùn era po u prima locu ind’elli s’accuglianu i giovani di u paese. C’era statu un punticellu ver di Chidazzu, è puru a machja di sopr’à a Funtana Maiò, ver di a Pughjola, à Marignana parechji anni innanzu.
A primura era sempre stata d’ùn esse à a vista di l’altri. Micca ch’elli ci fussinu e cose da piattà, ma cusì si davanu l’imprissione d’esse più tranquilli è sicreti, ma a pace è u sicretu par issi paesi…
Quella notte, intrat’aostu, falavanu in quattru, parechji altri eranu dighjà à u muru è s’eranu stracquati, o piuttostu strallati in tarra. Fidiavanu e stelle è a si discurrianu. Facianu cusì l’ore sane, era u so scialu.
U locu ùn era micca schiaritu da i lumi di u paese, face chì ci si vidia poch’è micca, è ancu s’elli l’avianu sceltu par quessa dinó, à andacci da par sè di notte, à parcorre ‘ssi trè centu metri in lu bughju, o ancu in lu bughjone i ghjorni di luna nova, vinia male s’omu era soli. Si facia quand’ellu ùn si pudia fà almenu ma tandu ùn era tranquillu è spinsiratu nimu.

In trè o quattru, a chjachjarata cupria u silenziu di l’angoscia, è cusì falavanu pede pede. À chì stava à sente a musica, à chì chjachjarava. Veni vinendu ghjunghjianu à u locu, è l’altri, una trintina, eranu in vista.
Ma à unu ch’era più sintachju, li parse di sente calcusella strada facendu. Fece chità i so cumpagni, è stedenu tutti in arechje : d’infatti si sintia un irrispiru, ma appinarella.
Faledenu à truvà quill’altri ma mentre ch’elli s’avvicinavanu, cinquanta metri in quà da u muru, si sintia più forte è à ch’ùn era cioncu ùn lu pudia mancà.
Ghjunti ch’elli funu dissenu à l’altri, ch’eranu à discorre è à ghjuculà, ch’elli stessinu citti : tandu si sintì chjaru un frombu putente, un soffiu par megliu dilla. Un soffiu tamantu, più forte cà un mughju, chì paria tuttu un istridu, chì vinia da a machja più insù è chì paria luntanu cinquanta metri.
Subitu ‘ssu suffione dede u siscu è messe u spaventu, è senza mancu circà di capisce i giovani sbiguttiti scappedenu à la lestra.
Dopu ghjunti più insù, quelli ch’ùn eranu sfiatati nè spirditi cumincedenu à raghjunà : chì sarà, ch'ùn sarà ?

(da suvità)

Prestu u racontu di a siratina si fece in ogni casa. Inghjunu disse a soia par ispiigà u fattu.
Si pinsò à un porcu, ma par avè una rispirazione simule, avia da esse altu quantè un omu. Uni pochi, chì fidiavanu troppu i filmi d’orrore, parlavanu d’un animale ch’ùn s’era mai vistu. I vechji cuntonu dinó ch’ella c’era una tomba – è daveru c’era – versi ‘ssi lochi chivi, a Crughjichja ch’elli si chjamavanu, è chì durante a guerra avianu impiccatu una famiglia sana culà. Tandu sarianu stati i spirdi scuntenti è istrosi da tantu u rimore ogni sera à fassi sente.

« U Soffiu », cum’ellu era chjamatu oramai, era in tutte e discursate. I maiò, i giovani, inghjunu ne avia intesu parlà, inghjunu u vulia sente.

E donne ch’eranu soliti à passighjà da sera si cansedenu à sentelu è l’omi chì l’accumpagnavanu avianu prumessu di cullà in la machja à vede ciò ch’ellu era. Ma ghjunti ch’elli eranu davant’à ‘ssu soffiu imprissiunante, chì à volte paria ancu in le furie, è tandu criscia, rispirava più prestu è più forte, ùn la si sintì più nimu d’andà à scopr’aria quassù.
A superstizione pigliava a suprana, tantu più chì u Soffiu c’era sulamente di notte.

Quantunque dui di i giovani, Larenzu è Marcu, ch’eranu stati i prima chì l’avianu intesu, impauriti è bè, eranu curiosi. À ‘sse storie di funzione è di morti ci davanu pocu creditu, è dicisenu d’andà à vede da par elli. Ne parledenu à l’altri è unu si dicia bramosu anch’ellu di falla finita cù ‘ssu misteru.
A strada partia da l’Ustaria di a Rota, è da più à menu andava long’à stradò, ma più in altu. L’intrata di a strada paria sciuta da un sunniacciu : un pullone seccu è un ghjambone facianu cumè un arcu di sopr’à a strada è inseme cù un muzzicone da l’altra banda, sarravanu l’intrata quantè ch’ella fussi un purtone. A luce, ch’era poca, lasciava una bella mità di l’intrata in lu bughjone è li dava una simbianza mistiriosa è inquitante.Tandu u terzu ùn avia più tantu a brama d’andà, è lacò i so cumpagni.
Larenzu è Marcu andedenu avanti è intrinu in lu bughju.


(da suvità)

Larenzu, chì à Marcu li purtava dui anni, viaghjava cù u calmu. Marcu unvece, circava ogni scusa par andà in daretu. « Fideghja, si sò sfatti i me liacciuli, quì ùn si vede null’è niente, ci vole ch’e’ volti è turnalli à fà ! » prupunì Marcu ma Larenzu ùn volse sente nulla.
« È chì pò fà s’elli sò sfatti i to liacciuli ?
- Ùn si sà mai, ch’ellu ùn ci civri calchì lofia. S’ellu ci vole à parte à corre cumu facciu eiu tandu ?! ».
Ma a curiusità suparava a paura. Viaghjedenu un quartu d’ora cusì, in silenziu, appena in pinseri ma ancu cù a curiusità sempre più acuzata, senza tantu intrampulà chì a strada era netta. U Soffiu si sintia sempre di più, è tandu avianu da esse vicini vicini. Ghjunsenu ind’un locu più apartu. A strada cuntinuava ver di u Tassu, un paisolu abbandunatu, ma oramai u Soffiu era à manu manca, è era faciule à esse da mez’à elli è u stradò. Ci vulia à falà. Ma strada micca, è ‘ssu locu ùn l’avianu mai battutu. Face chì dicisenu di vene à scoprelu di ghjornu è di vultà un’antra volta. Issa dicisione rinchiria à Marcu chì vulia rinuncià sguasgi da u principiu.

Intantu, più cà mai si trattava di u Soffiu. Giovani è menu giovani, quelli ch’ùn battianu tantu par isse loche u vulianu sente.
Dui pullastroni ch’avianu u scooter è chì si ne ridianu di tuttu ‘ssu rimusciu, dumandonu à Marcu d’insignalli u locu è quessu, maliziosu cumè un ebreiu, i purtò culà senza avartisceli di ciò ch’elli eranu par sente. Appena arrivati soprallocu, fecenu piantà u mutore di u scooter : u soffiu c’era, più stizzosu cà mai, è cum’ellu a si pinsava Marcu, dede u siscu à i pullastroni è subite subite li cacciò a risa chì li stava in bocca da quand’elli ne avianu intesu parlà. Filippu volse rimette a mottò in marchja, ma ùn c’era manera, malgradu e so prove furiose. Fendu cusì si mittia a paura da par ellu. Li vinianu in mente tutte ‘sse scene di sinemà, quandì u piriculu s’avvicina è chì u mutore ùn si vole accende.
Nicolu, ch’era daret’à à Filippu annant’à a mottò è spavintatu anch’ellu, si cacciò à fughje à pedi. Fatta fine Filippu a li fece à fà parte a mottò, è scappò à spiccera. Marcu fù cuntente di a so brulla, è tandu si ne cullede pianu pianu, avvezzu ch’ellu era oramai à ‘ssu Soffiu.

Marcu è Larenzu eranu andati à visità u locu di ghjornu. Ci avianu vistu e tombe è ancu una cappella spiantata, à meza machja, invadita da u lamaghjone. Però di ghjornu u Soffiu si firmava mutu, è ci vulia à andà di notte, dopu chjinatu u sole.
Ma l’affare pigliava un gattivu versu. Oramai certi giovani s’eranu armati, è ci andavanu in vittura in parechji : unu o dui si mittianu in lu coffre apartu, purtavanu u fucile à l’armu è tiravanu calchì fucilata passendu davant’à u locu, senza mancu piantà.
Ùn ci si pudia più andà senza andà à u risicu di fassi tirà cumè un cignale.


(da suvità)

Scorse u tempu. Uni pochi di ghjorni dopu, i giovani s’eranu avvezzi à ùn andà più inghjó è oramai s’avianu sceltu altri lochi par ritruvassi. Oramai quaghjó ùn passighjava più nisunu, ma di u Soffiu ùn s’era scurdatu nimu.
Bramosi di finiscene cù l’affare, Marcu è Larenzu avianu pripostu à tutti l’altri d’andà inseme à vede ciò ch’ellu pudia esse. Face chì si furmò un gruppu d’una quindicina di giuvanelli, masci è femine à buleghju, è a truppa si ne andede à vistigà ‘ssu locu mistiriosu.
In testa ne marchjavanu Marcu è Larenzu. Eranu i più sireni, chì cuminciavanu à cunnosce i lochi. Quill’altri unvece eranu angusciati è agitati, è ancu s’ella li vinia a risa calchì volta, era una di ‘sse rise narbose ch’ùn piatta mai a paura ch’omu sente.
Si facianu avanti in la machja, è u rimore sordu criscia. Ghjunsenu ind’ellu ùn ci hè più strada, piglionu capu ghjó è prestu si truvonu à a cappella ruvinata. Avà u Soffiu cupria ancu e voce, è l’accurria à parlà forte par fassi sente. Ma pudianu sente da duv’ellu vinia : u Soffiu falava da in aria. Ghjunsenu da sottu, si messenu à u pé d’un arbure è cusì sappenu ch’ellu vinia da a rama d’un alberu. In la notte più di calchì tacca nera ùn si vidia. Ma u misteru di u Soffiu era mezu cà sculifatu, è in fin’ di conti, ancu par ùn palisalla eranu appena delusi.
Aghjà ch’ellu si sapia ch’ellu avia da esse calchì acellu, e ricerche funu prestu fatte. Uni pochi di ghjorni dopu, vensenu à sapè chì certi acelli sciacchitteghjanu u bizzicu cusì prestu ch’ellu si sente cumè un soffiu.

Marcu vultò in paese pà i Santi, è ci andò solu di notte : u Soffiu c’era sempre. Ci vultò un' antra volta d’invernu, è tandu più nulla.
Veni vinendu a cagione di tanti turmenti era stata un acillucciu.



PS : in tuttu u racontu, aghju cambiatu i nomi

Tremenda issa storia, quale hè chì l'hà invintata? tù?

(Nient'à dì, for di a parodda "impressiunante" a sola cosa ch'ùn m'aggarbe tantu ind'u testu ; ùn ci hè bisognu di dumandammi u parchè... ùn 'dda sò manch'e' )

Bravu o tèstè.

s'è vo ùn avete lettu a storia ùn lighjite stu missagiu



bella sturietta...
ci riesci bè à facci entre.
bella qualità di lingua...
nulla à dì cacciatuci un picculu puntu di nulla ...

eiu scrivu in una parolla sola da zeru à centu, mi pare chì l'usu ùn sia ancu stabilitu bè...
ferma chì trè centu scrittu staccatu ùn pò micca andà induv'ellu si dice trecentu (dj)

voi dite trè centu tch?

per rivene à a storia:
ùn s'hè mai sappiutu l'acellu ch'ell'era?
ch'ellu ùn fussi statu un saccu minutu...

Beddu racontu ind'i lochi chì cunnoscu....

L'aceddu, u solu, ch'aghju vistu è intesu "suffià" hè u bicazzu.... quand'eddu si senti in piriculu, faci fronti è soffia. Ma ancu a pecura soffia... ma edda, dopu, scappa.

Aghju vistu un bicazzu in pienu istati... forsi ch'eddu era statu firitu mentri a staghjoni di caccia.
In quantu à l'appuddatoghju, n'aghju vistu unu nant'à una fica secca, in punta...
Ancu unu chì si bagnava ind'un pozzu à l'orlu di u stradeddu...

Par l'acellu, ùn m'arricordu più bè ciò ch'ellu era, ma era un acellu di notte, una spezia di malacella ma ùn sò mancu più sicuru...

Facia un irrimore cuntinuvu, un pocu cumè quand'omu sfuglitteghja prestu prestu e pagine d'un libru.

Mi ci hà fattu pinsà mamma l'altru ghjornu, passendu davant'à a Crughjichja, tandu aghju pinsatu chì saria bè à pruvà à cuntalla

eccu mi paria d'avenne digià parlatu.


http://foru-corsu.forumactif.com/filu-d-amparera-f6/a-scrittura-di-i-numarimatteu-mattei-t2356.htm?highlight=numari