Di Giorgio Scerbanenco, traduttu da u talianu.

« Ùn capiscu micca », disse u duttore, « ùn capiscu micca cumu hè ch’ellu ùn dorme micca ». U zitellu era in salute, nurmale, assai intilligente. « A sera magna abbastanza o pocu ? », dumandò à a mamma.
U zitellu iscì è andò in cucina, a giovana mamma stava ritta ritta, impassivule, un pocu inchjappita.
« Magna assai, a sera » disse.
« Ùn capiscu micca », disse u duttore, « ùn capiscu micca ».
A mamma si scuzzulò appena. Stede à sente u chjuculellu chì ghjucava cù e cuchjare in cucina.
« Eiu a sò, parchè ch’ellu ùn dorme », disse.
« Ma tandu a m’aviate da dì », disse u duttore, « hè un mese chì no andemu avanti à curà à palponi. A m’aviate da dì », ripitì. « Parchè ùn dorme micca ?... »
« Parchì quì ùn ci passanu i camiò », disse a giovana mamma. Ùn l’avia micca detta prima parchì li dispiacia à dilla. « In la casa indè no eramu fin’à un mese fà, a sera cuminciavanu à passà i camiò, ne passava tanti, tutta a nuttata. Ellu, a sera, ùn s’addrumintava micca finch’ellu ùn ne passava unu. Quand’ellu sintia u rimore d’un camiò chì passava, li vinia u sonnu, è durante a notte, finch’ellu sintia i camiò chì passavanu ancu in lu sonnu, durmia tranquillu, sì unvece par calchì ora ùn ne passava manc’unu, tandu finiscia par ispartassi. »
« Stranu », disse u duttore, « hè un pocu stranu. Parchè ùn dorme micca senza camiò ? ».
« Parchì so babbu hè un cunduttore di camiò. Ellu l’aspetta sempre, l’aghju dettu ch’ellu face un viaghju longu. S’ellu sente i camiò stà tranquillu, pó esse u babbu chì volta. »
« È quandu volta u babbu ? », dumandò u medicu.
« Ùn volta micca. Ne hà spusatu un’altra », disse a giovana mamma.

Ci hè una storia para à ciò ch'hè t'ai scrittu, si trova ind'u libru di Romani "Prosa fattiva", ma ùn m'arricordu di u so titulu.

Tanti saluti !

Una ch s'assumiglia ma micca cus trista...

A me arcizia campava in Nizza è un annu, ghjugni ind'è a suredda (minnanna) in L'Acqualonga, paesi d'Acqua com'è u so nomi u ramenti.
Era quì pà una simana...

A prima notti, impussibuli ch'edda dormi.
- Chì t'accadi ? dumanda minnanna.
- Ùn aghju pussutu dorma cù tutti sti ranochji chì cantavani...

Trè notti di fila, listessu affari. Dopu, s'hè avvezza è hà durmitu com'è un criaturu.

Una simana passa è eccu la chì si ni riparta in Nizza.

U lindumani, Minnanna a chjama da sapè sì tuttu andava pà u megliu...

- Sò stanca morta ch'ùn aghju durmitu sta notti, risposi l'arcizia.
- È parchì ? dumandò Minnanna.
- Mi mancani i ranochji !