I NOSTRI SCRITTI !

erbaghju · Bucugnanu & Marignana Nombre de messages: 2094 Date d'inscription: 10/10/2006

U sole:
O la mio fiera cumpagna,
o carrissima surella.
U ghjornu chì ci sò eiu,
tù faci a durmitella.
A notte spampilluleghji,
sè di tutte la più bella.

A luna:
Sò di tutte la più bella,
tù mi faci tropp'onore.
Tù chì ci porti u lume,
una carezza di calore.
A ghjente per u ringraziu,
ti chjamavanu Signore.

U sole:
Si eiu sò lu Signore,
tù sè propiu una Dea.
Chì a Natura anch'ella,
s'hè custretta à l'idea.
D'aspettà i to mumenti,
per fà cresce i sumenti.

A luna:
Chì serianu 'ssi sumenti,
privati di u to caldu.
Chì tù sparghji ogni ghjornu,
da lu mare à lu valdu.
Chì lu to soffiu paternu,
c'hà cacciatu da l'infernu.

U sole:
Seria puru l'infernu,
una vita sciagurata.
Un mondu senza lumera,
una terra abbughjata.
Ma lu to dolce surisu,
l'hà per sempre scunghjurata.

A luna:
L'aghju scunghjurata eiu,
carrissimu suleone.
Ma senza lu to aiutu,
ne seriamu à bughjone.
Chì tuttu lu me splendore,
ne sè tù lu veru patrone.

U sole:
Eiu ùn ne sò lu patrone,
ti trovu bella mudesta.
Chì sè u più bellu astru,
di l'uscurità celesta.
Incù a to nera chjoma,
hai le stelle in la cesta.

A luna:
Cume a nott' è lu ghjornu,
intricciati di natura.
Semu lu sole è la luna,
chì ci spartemu l'altura.
S'è no aviamu un figliolu,
seria una bella fiura.

erbaghju

erbaghju · Bucugnanu & Marignana Nombre de messages: 2094 Date d'inscription: 10/10/2006

Possu allivà un porcu,
ingrassarà da par ellu.
Manghjaremu tuttu l'annu,
prisuttu è ficatellu.
È pò lascia corre o mà,
faraghju lu pasturellu.

S'ella mi casca una sposa,
li mettaraghju l'anellu.
Per toccami una prima,
averemu un zitellu.
È pò lascia corre o mà,
faraghju lu pasturellu.

Vogliu esse un gran' pueta,
per risponde à l'appellu.
Incù quelli di l'Acquale,
Buscagliolu è Minellu.
È pò lascia corre o mà,
faraghju lu pasturellu.

Di u gran' Napuleone,
pigliaraghju lu mudellu.
Indè a cavalleria,
incù nostru sumerellu.
È pò lascia corre o mà,
faraghju lu pasturellu.

Andaraghju in Marseglia,
chì per fà u maccarellu.
Aghju dighjà lu custume,
a pistola è lu cappellu.
È pò lascia corre o mà,
faraghju lu pasturellu.

Per amparà lu capitanu,
è navigà cù lu batellu.
Cullaraghju in Bastia,
cù lu nostru trinichellu.
È pò lascia corre o mà,
faraghju lu pasturellu.

Post' annantu u me tronu,
possu fà lu principellu.
Tutti ghjorni caccighjendu,
in giru à u me castellu.
È pò lascia corre o mà,
faraghju lu pasturellu.

S'è tù camp' in la muntagna,
megliu faci o figliolellu.
Una vita di cuccagna,
à corre incù l'agnellu.
Eiu lasciu corre tuttu,
fà puru lu pasturellu.

erbaghju

erbaghju · Bucugnanu & Marignana Nombre de messages: 2094 Date d'inscription: 10/10/2006

Ghjuvan'Federiccu a écrit:

A MUSA DI U ME ESSA

Aghju spechjatu a me menti
In l’acqua di una surghjenti
Pà pudè cunnoscia a musa
Ch’in lu me cori hè rinchjusa

Trà u trimuleghju di l’onda
C’era issa donna vagabonda
Tali un riflessu luntanu
Mi faci segnu cù la manu

Hè a musa di u me essa
A magnifica principessa
Chì mi voli muscià a via
Di la più bedda puesia

A suvetu in l’oscurità
Di u chjassu di u puetà
Trà la fedi è u timori
Hè par me u solu albori

L’accarezzu un mumentu
Cumu a pioghja trà lu ventu
Annacquendu tutti liversi
Ch’in u me capu si so persi

Presu d’un mumentu d’orgogliu
Pidd’un penna hè un fogliu
Pà annigrì li me penseri
Di furtuni è d’addisperi

Dipinghjendu issa criatura
Fatta di rima è cultura
Chi farà parti a l’eternu
Di a me vita u quadernu

U PASTORE BUNIFAZINCU

francesca

cum'ellu hè lestru issu Erbaghju! cheers

_________________
Tibè libaru
http://www.myspace.com/francescamar

erbaghju · Bucugnanu & Marignana Nombre de messages: 2094 Date d'inscription: 10/10/2006

Ghjuvan'Federiccu a écrit:

Bonghjornu madamisgedda
Scusate sè mi permettu
Ma vurria a me bedda
Intunavi un terzettu
Pà vo chi seti a stedda
Chi splendi in u me pettu

Di splenda in quissu pettu
Hè par me un veru onori
Ma, cù tuttu u rispettu
Un nè vali u labori
Ch'un basta un’versu schiettu
Pà cunquistà lu me cori

Pà cunquistà quissu cori
Socu ghjuntu dà luntanu
Aghju svighjatu l’albori
Cù lu me cantu supranu
Denduvi u me amori
Pà piddà la voscia manu

Di piddà la me manu
Vecu chi seti decisu
Vi po ancu parè stranu
Ma un so di quiss’avisu
Chi i paroli in vanu
Si leghjenu nant’u visu

Anantu a lu me visu
Ci seti vò, car’amata
E feti d’ogni surrisu
Una prumessa stampata
Chi m’appri lu paradisu
Pà fà di vò a me spusata

D’essa la voscia spusata
Ci voddu un pocu pinsà
Quissa stonda aspittata
Un si devi micca guastà
Tandu un socu prissata
E quissu ghjornu venerà

U santu ghjornu hè avà
Faleti amezzu a via
Chi vi vurria dimustrà
Incu tanta mudestia
Chi vi possu rigalà
A piu bedda cumpagnia

A piu bedda cumpagnia
Mi pari troppu vanità
Incu tanta dichjaria
Mi vuleti ammaistrà
Ma la voscia irunia
Un mi puderà ingannà

Un vi vurria ingannà
Chi di vo socu strigatu
Un so piu a chi pensà
E ne diventu malatu
Ch’un mi possu immaginà
Senza vo a lu me latu

Pà essa a lu mè latu
Avereti monda dà fà
Un seti assicuratu
Ch’una canzona bastarà
Speru chi seti priparatu
A duvè un pocu strazià

Socu prontu a strazià
A sonu di mandulina
Pà pudè cusi cantà
Sin’a dumani mattina
Issu sintimu di benistà
Chi faci la me ruina

Di fà la voscia ruina
Mi pari esageratu
Faleti a la marina
Sè ne seti ammalatu
Pà circà a medicina
Chi curarà quissu statu

Seti vo a medicina
Chi cura la me ferita
A me stedda mattutina
Da mè sola preferita
Chi speru d’ave vicina
Pà u restu di a vita

Ne socu avà cunfusa
Chi m’aveti ingannata
L’estru di à voscia musa
M’hà d’un colpu incantata
Un aghju piu una scusa
So avà innamurata

Di viva sempri cuntenti
Hè par mè una primura
E ch’ognunu si ramenti
Quiss’unioni cusi pura
Chi mi firmarà a menti
Fin chè a me vita dura

Fin chè a me vita dura
Ghjuru amori internu
Di pidda cù tanta cura
U me impegnu maternu
Pà una vita futura
Chi firmarà a l’eternu

U PASTORI BUNIFAZINCU

erbaghju · Bucugnanu & Marignana Nombre de messages: 2094 Date d'inscription: 10/10/2006

Avà soffi' a so sciagura,
l'assassinu invasore.
Cù una mane inumana,
hà suminatu lu terrore.
Cum'ellu facia prima,
u cruderu inquisitore.

Un rughjone marturiatu,
è un populu offese.
vinti trè era lu ghjornu,
è ghjungnu era lu mese.
In piazza à u cunventu,
Calacuccia u paese.

Privatu di cumpassione,
ùn si ne sente una cria.
Innucente 'ssu zitellu,
tuttu lu mondu a sapia.
Albertini a so casata,
u nome Marcu Maria.

In qualità di prucessu,
questu quì hè corciarellu.
Ùn si parla d'avucati,
per diffende u pasturellu.
Per fà piantà la rivolta,
ci vulia un mudellu.

O Corscia tristu paese,
d'inghjustizia imbruttatu.
U vechju castagnu avà,
si sente anch'ellu spurcatu.
Di purtà questu cugnome:
l'arburu di l'impiccatu.

Ùn ci vole à scurdassi,
d'istu ghjornu di scumpientu.
Avà site in l'altru mondu,
abballatati da lu ventu.
Tenaremu lu ricordu,
impruvisendu 'ssu lamentu.

erbaghju

erbaghju · Bucugnanu & Marignana Nombre de messages: 2094 Date d'inscription: 10/10/2006

MARCU MARIA a écrit:

Vogliu cullà in Tavignani
Francà a bocca Arinella
Saluteraghju lu pastore
Accarizzend'a pecurella
A la funtana d'e Buniacce
Accant'à ellu,a tinella...

A manu manca c'è Aleri
Da sopr'a casa Fronzula
Quassù oghje ùn c'è nimu
Fora di a bucertula
Arrustendusi lu spinu
Nantu à ogni balzula.

Dend'un'uchjata à diritta
Vecu à Teneracciola
Per a cunquista di u Pasciu
Era tremenda a battaglia
Tra Curtinesi è Niulinchi
Fora di quelli di Sidossi.

A l'entre di u castagnu
Avà si sente lu rimore
Di l'acqua di Tavignani
Chì ci ralegrera lu core
Di u rifugiu di a Sega
Ritruveremu lu calore.

Techji di pan'è di caffè
Ripiglieremu lu caminu
Cuglieremu duie fragule
Sott'à u fustu di lu pinu
U fiume chjaru è serenu
Pare sunà di viulinu...

Francata ora a Scruchjella
Eccuci ghjunt'in Sarravona
Induve corr'acqua furiosa
Quant'è quella di a Gravona
Puru per esse muntagnolu
Cusi bellu locu stona.

Sentimu le campanelle
Di e capre di u Ceppu;
Miremu lu piscadore
A musetta carc'à tappu
S'ellu vene u guardianu
Attenti à lu permessu !!

Attipemu versu e cime
Pè a valle di Giovanaccia
Seguitendu l'acqua fresca
Ghjungheremu sin'à Goria
Quassù postu nant'un scogliu
Cuntemplaremu lu Niolu !

Rifallend'à mez'à l'alzi
Franchendu li fiumicelli
Pocu nanzu à e Lenze
Passan'in furia li cignali
Eccuci in Camputile
Incu a volpa è li cavalli...

Tasterem'oghje lu brocciu
Di i stazzi di Vaccaghja
U ci purterà Natale
Cù appena d'acqua vita
Vicini ci sò e scaffe
U palu è le fattoghje.

Sott'a frsicura di li fai
Avviemu versu Ninu
Ma francat'u Pizzu Guardu
U sole si face nemicu
O chì piacè di ritruvà
Di l'Inzecche l'acqua fresca.

Infine scuprem'u lavu
Inturniatu di virdura
U riflettu di u Tozzu
Si spechja in l'acqua pura
Allora chjudemu l'ochju
Ci pare d'esse in paradisu...

Marcu Maria

erbaghju · Bucugnanu & Marignana Nombre de messages: 2094 Date d'inscription: 10/10/2006

Ghjuvan'Federiccu a écrit:

Sarru l’occhji un mumentu
E ti ne si digià andatu
Cumu pulvara in u ventu
In u celu sè cuddatu
Senza pinsà un mumentu
A cio chi ai lasciatu

U to locu tantu amatu
Accantu a la to ghjenti
Induva ai suminatu
Tanti stondi è ramenti
Ricordi di un’passatu
Paroli di un’prisenti

Pà tè mi voddu ricurdà
Cio chi fù la to vita
U to chjassu u to campà
A to passioni ardita
Ch’in mè sempri brillarà
Cum’un alba infinita

U PASTORI BUNIFAZINCU

erbaghju · Bucugnanu & Marignana Nombre de messages: 2094 Date d'inscription: 10/10/2006

erbaghju a écrit:

Ùn mi pare mancu vera,
à lu spuntu di a vita.
D'avè ghjà persu a spera,
d'una sciala infinita.

Suminatu di bellezza,
dolce fruttu di l'amore.
Annacquatu di carezza,
eri un bellissimu fiore.

Ogni stonda impannata,
di tenerezza materna.
Hè stata rimpiazziata,
d'una tela nera è terna.

Oghje ùn hè più listessu,
chì ci manca lu to pernu.
Chì a vita à l'eccessu,
t'hà mandatu à l'eternu.

O la mio creaturella,
o lu mio core preziosu.
Finita la guaitella,
vai à locu di riposu.

Hè partutu lu zitellu,
à capusù in paradisu.
Avà face l'anghjulellu,
è ci manda un surisu.

erbaghju

erbaghju · Bucugnanu & Marignana Nombre de messages: 2094 Date d'inscription: 10/10/2006

erbaghju a écrit:

O lu mio caru missiavu,
u nostru capimossa.
T'aspettu dumaitina,
Chì tù veng'à la riscossa.
Di tutti sti cacciadori,
ch'ùn cunnoscenu a mossa.

Cù Antone u to fratellu,
cantà vogliu la passione.
In la ghjarghja di l'Arestu,
da sopra à lu Speluncone.
Ellu facia e voce,
per fà move li sigone.

Da Lione è da Culombu,
eri sempre accumpagnatu.
Parianu campanelle,
in la Bocca à u Provatu.
Cani di razza cursina,
capu neru è turcatu.

D'Acquaviva à l'Arnella,
è passendu pà Talogna.
Avà si ch'aghju capitu,
a dicu senza vergogna.
Eri tù lu veru patrone,
di 'sse macchje è 'sse macchjone.

Ma oghje mi tocca à mè,
quandu francu u Pittinaghju.
Di salutà la cruciarella,
quandu mi ne passeraghju.
À ritruvà lu to estru,
in la culletta d'Erbaghju.

erbaghju

erbaghju · Bucugnanu & Marignana Nombre de messages: 2094 Date d'inscription: 10/10/2006

Ghjuvan'Federiccu a écrit:

Vi voddu avà racuntà
Incu tanta emuzioni
A storia é lu campà
Di un omu d’eccezzioni
Chi ci facia viaghjà
Incu l’impruvisazioni

Pà issu pueta asgiatu
Principiu avà lu cantu
Ch’iddu sia rimarcatu
E ne purtessi lu vantu
Di lu versu prufumatu
Chi li piacia tantu

Natu in quissa puvertà
D’una famidda maiori
Duvia sempri stantà
Pà un pocu di chjarori
Chi u facia sunnià
Luntanu dà issu malori

Istruzzioni un avia
E ne diventò pastori
Incu sola cumpagnia
Da la sera à l’albori
U versu di puesia
Chi tinia in u cori

Li piacia lu mistieru
Ne cunniscia l’arti
Di u so locu era fieru
Ni parlaia ogni parti
Cù corsu é furesteru
Issu fruttu vulia sparti

Tinia a la tradizioni
Un mancava una fiera
Di messa in prucissioni
A fedi era sincera
Dendu vodda di canzoni
Da la mani a la sera

Suitendu quissa stonda
Chi u pueta tantu ama
Iddu sapia risponda
A lu sunà di la chjama
Di a musa vagabonda
Avia l’eterna brama

Vola avà la so rima
In u celu d’erternità
Lampendu cù tanta stima
Un versu pà issi quallà
Incu quidd’estru di prima
Chi hà saputu cunservà

Compiu avà la canzona
Di quiss’ultimu ramentu
Ricurdà quissa parsona
Mi annacqua da lu pientu
Chi sempri in mè risona
U so immensu talentu

Speru solu ch’issa vita
Fatta di fedi é onori
Serà sempri custudita
In u fondu d’ogni cori
Ricurdendu a l’infinita
Quissu pueta pastori

U PASTORI BUNIFAZINCU

erbaghju · Bucugnanu & Marignana Nombre de messages: 2094 Date d'inscription: 10/10/2006

erbaghju a écrit:

O carissima Sonietta,
o carissimu amore.
Tù chì di l'arcubalenu,
hai tutte le culore.
Ti mandu una carezza,
ti mandu un bellu fiore.

À l'acqua d'una funtana,
bellissimu gigliu biancu.
Spartemu un lindumane,
chì annu ùn c'era ancu.
Incù u listessu stintu,
di viaghjà fianc'à fiancu.

Ch'ella sia in muntagna,
à cuttighjà un arghjettu.
O di e torre pumpose,
sente lu mare dilettu.
Cantem' à voce rivolta,
a paghjella è lu terzettu.

S'impruviseghja lu cantu,
chì ralegra u nostru core.
C'aspetta ancu a luna,
cù a so bionda splendore.
Avà l'ondici di lugliu,
ne cunnoscu lu valore.

I love you

erbaghju

francesca

oooo! hè un anniversariu l' 11 di lugliu...? Beati i innamurati... tanti belli puema chì ci anu datu! flower

_________________
Tibè libaru
http://www.myspace.com/francescamar

erbaghju · Bucugnanu & Marignana Nombre de messages: 2094 Date d'inscription: 10/10/2006

erbaghju a écrit:

Russignolu, Russignolu,
u to versu hè rinumatu.
Ogni volte ch'è ti sentu,
u mè core hè incantatu.
Ch'ella sia in Niolu,
à a fiera di u Pratu.

Rispondendu colpu à colpu,
à e chjame di l'Acquale.
Un acellucciu di Zilia,
portatu da u Gregale.
Hè venutu in muntagna,
per cantà a so Balagna.

Vestutu di puesia,
è di l'impruvisazione.
Rispettate in ogni locu,
amicu le to canzone.
Hai suspesu à l'eternu,
nostra bella tradizione.

Quandu d'estate a sera,
si sente russignulate.
Un silenziu rispettosu,
rispond'à l'impruvisate.
Nostre muse à l'unione,
piglianu le to lezzione.

Stemu à sente lu ralegru,
u to cantu salutivu.
Chì serà u to sicretu,
per esse sempre à l'abbrivu ?
Russignolu dimmià,
serà l'oliu di l'alivu ?

Quessa a sapemu tutti,
chì l'acqua di a Balagna.
A dice ancu u pruverbiu,
ch'ella caccia la macagna.
Ma serà forse u Libecciu,
chì t'hà fattu cantarecciu.

D'un cugnome acellime,
impannatu di talentu.
A to musa hè una fiara,
attizzata da stu ventu.
Ch'ellu tirga sempre forte,
è u focu ùn sarà spentu.

Sì di a Cultura Corsa,
cantà vogliu lu figliolu.
Avà ti lasciu andà,
chì tù piglii u to volu.
À truvacci per ste fiere,
amicacciu Russignolu.

erbaghju

erbaghju · Bucugnanu & Marignana Nombre de messages: 2094 Date d'inscription: 10/10/2006

so a écrit:

Fideghji lu Russignolu
Chi canta tuttu u ghjornu
Fendu le piu belle chjame
A l’altri pueti intornu
Ed ellu ùn si pianta mai
Di mezzanott’à mezziornu !

Quandu c’hè stu vichjarellu
Si rallegra u mo core
È a voce pura è schjetta
Di st’omu chi hè pastore
Mi trasporta in un soniu
È mi dà dolce calore

Ne capiscu lu splendore
Quand’ellu rispond’in rime
Ad Olivier chi lu chjama
D’una manera sublime
A l’usu tradiziunale
Paria sent’ acqualime !

Roccu Mambrini di Zilia
D’una terzina maligna
A quellu chi ùn risponde
U so bastone l’alligna!
Ùn mi scurderaghju mai
di sta serata in Pigna !

Vi vuleria à ringrazià
Russignolu d’avè messe
Tante emuzione in u mo estru !
Vi possu fà qualche prumesse
Di risponde à l’appellu
Chi sarà d’estate po esse

cheers

Sonia