I NOSTRI SCRITTI !

erbaghju · Bucugnanu & Marignana Nombre de messages: 2094 Date d'inscription: 10/10/2006

rappallinu a écrit:

L’altru versu

Vogliu tuccà cù l’ochji ciò chì a manu ùn sente
È vede l’altru versu di cose tralucente
Sapè e fiure nate da ciò ch’ hè senza esse
Intriccià mi à l’ore chì a tela ci tesse

In ‘ssu mondu di sognu mi ci vogliu affundà
Da esse qualchì sia c’ùn hà realità
Esse nulla è à tempu, tuttu pudè pruvà
Donna, omu, zitellu ancu acellu chì sà ?

Iè ! esse l’altore, vulà sopra à u mondu
Duv’ellu ùn ci n’hè più, nè bè, nè puru male
Vulà, vulà dinù spiritu vagabondu
Apre, chjode è pò apre di ogni virtù l’ale

Quand’in quandu falà è tuccà torna tarra
Lascià mi una cria ‘sse falze libertà
Per esse torna eiu, a mio vita campà
Quant’unque, hè cusì bella, ancu per esse amara…

Rappallinu

erbaghju · Bucugnanu & Marignana Nombre de messages: 2094 Date d'inscription: 10/10/2006

Cumpà a écrit:

Citation:

Cantu di u Machjaghjolu

Quand’ u bellu veranu schjatta di li so mille fiori
O chì l’estate caldu sparghje tutti li so culori
Quandu lu dolce vaghjime ci piglia in la so magia
O quandu l’inguernu fieru inneva cun’alterigia
Eiu, mi ne stò piattatu, mi ne stò à lu sicretu
Firmendu mutu, immobile, ma mai à l’arrichetu
M’anu dettu banditu è m’anu dettu malfatore
Ma a verità hè chì sò eiu un’omu d’onore

U bellu cantu di l’acelli chì rallegra le machje
Mi face sminticà u stridu di tutte le curnachje
Passu lu ghjornu chjosu, aspettu l’ore di la notte
Per esc’appen’in libertà, sempre dritt’in le mio botte
U filu di la mio vita m’hà purtatu per sti lochi
Duve si camp’à lu sicretu è li piacè sò pochi
Ma sò eiu un’machjaghjolu è brusgia lu mio destinu
Amicu di li venti da lu muntese à lu marinu

A mio storia hè cum’una fola, altiera è bella
Pare purtata da la manu d’una fata ribella
È sè la mio vita pò certe volte parevvi dura
Sempre la mio sorte hè la più fina è la più pura
Per avè fattu u mio degnu duveru d’omu corsu
Chì accetta a verità, micca li vani discorsi
M’anu dettu criminelu è mi facenu a caccia
È diventò lu nemicu d’una « ghjustizia » vigliaccia

Ma certe sere in u m’aggrottu, mi vene stu sonniu
D’un’alba più serena, di stu ghjornu di calcedoniu
Chì vederà infine u trionfu di a verità
È chì sì sbuccerà infine u fiore di libertà
In stu ghjornu benedettu, u castig’u compieraghju
Infine grazi’à Diu in paese riveneraghju
Ci camperaghju tutta la mio vita in serenità,
È dopu mi n’anderaghju in pace per l’eternità.

Cumpà

erbaghju · Bucugnanu & Marignana Nombre de messages: 2094 Date d'inscription: 10/10/2006

titic a écrit:

Aldilà

Aldilà di questu mondu,
Duvè ùn c'hè piu cuscenze,
Un spiritu vagabondu,
Po piglia cent' apparenze,
S'universu immateriale,
Cì pò fà esse plurale.

Si po esse capitani,
D una nave cunsenziosa
Aisà, a duie mani,
Una mossa virtuosa,
E fà luce un fanale,
Da fà cresce un ideale.

Si pò esse ancu pirati,
Senza ne pieta ne fede,
Daretu i screni, pietati,
A verita.. ùn si vede.
Diventa superficiale,
Di sintimu artificiale.

Ma, pudemu firma quessi,
Chè no simu in verita,
Differenti ma listessi,
Ricchi di diversità,
Fin' a truva lu nurmale,
Issu mondu virtuale...

.... What a Face

Titic

erbaghju · Bucugnanu & Marignana Nombre de messages: 2094 Date d'inscription: 10/10/2006

titic a écrit:

Dì mi

Eiu i trovu amari è tristi li to mondi,
Duve tù ti ne vai u to esse à distrughje.
U capu versu a terra, pienghi è ùn rispondi.
Cu stu velenu in tè cosa cerchi di fughje ?

Voli fughje lu sole, l'aria pura è l'amore ?
Dì mi s'è tù a pensi chì di campà ùn vale..
Voli fughje l'amichi, a dulceza d'un fiore ?
Dì mi perchè a vita ti face cusì male..

Duve tù ti ne vai, più nimu ùn hè vultatu,
Ùn ti possu lascià francà l'ultimu passu.
Dì mi chì possu fà pè dà ti torna fiatu,
Ùn ti possu lascià more à capu bassu.

S'è t'ùn poi parlà, basta ch'è tù mi guardi,
Tandu possu capì ancu ciò ch'è tù taci.
Dì mi chè tù a sai ch'ellu ùn hè troppu tardi,
E chì poi piantà stu scempiu ch'è tù faci.

Eiu è tù adduniti, cun forza di fà fronte
À stu velenu biancu chì corre in le to vene
Adduniti inseme da custruì stu ponte
Chè tù devi francà, core tesu à l'avvene

Titic

erbaghju · Bucugnanu & Marignana Nombre de messages: 2094 Date d'inscription: 10/10/2006

Tito a écrit:

Un mumentu ùn si pò spinghje
Ne distrughje o sguassà
A ciò u tempu stringhje
Nunda ùn si pò cancellà
Nantu à st’ore cusì linde
Un sì pò chè dì « disgià »...

Da chì un sintimu corre
In cerca d’un pianu à spannà
Senza paura o timore
Ghjustu un sintimu chì và
Intona è voga l’amore
Affiancu à l’eternità...

Dapoi un certu ghjornu
A mo strada pigliò l’insù
Maravigliendu à l’intornu
Ogni passu sempre di più
Riflettendu in u cuntornu
E passione di sta virtù

Un mumentu ùn si pò spinghje
Ne distrughje o sguassà
A ciò u tempu stringhje
Nunda ùn si pò cancellà
Nantu à st’ore cusì linde
Un sì pò chè dì « disgià »...

Da chì sta fiara s’incende
In cerca d’una libertà
Solu l’amore pò pretende
Guidà stu sognu à chjappà
In brama di spere à spende
A spera di u benestà…

Ore, minuti è siconde
Frà ciò chì si pò sgranà
Ind’è quelle chjare onde
Ormai vogliu navigà
Ramintendu tante stonde
E stu felice campà…

Un mumentu ùn si pò spinghje
Ne distrughje o sguassà
A ciò u tempu stringhje
Nunda ùn si pò cancellà
Nantu à st’ore cusì linde
Un sì pò chè dì « disgià »...

Cum’è in un altru mondu
Un mondu fattu di tè
Stu sintimu più prufondu
Insolca u mo perchè
Versu un locu senza fondu
Induve cresce u piacè…

Cum’è u volu d’un acellu
Invita à dì di sì
Nun un maestosu celu
Un turchinu à l’infinì
Uniti à stu gioiellu
Nunda quì ùn pò smarì…

Per ciò chì chjama l’avisu
Rimiru à ùn più finì
In quellu chjaru surrisu
Nunda ùn si pò smentì
Chì eiu trovu un paradisu
In stu surrisu custì

Prediletti è generosi
I passi di u tempu sò
Un si tenenu ascosi
D’amore sò e stasgiò
In sti detti amurosi
Ci hè sempre una rasgiò…

A stu mumentu divinu
Mi ne vogliu affiancà
Manu à manu à u destinu
In ciò chì pò rigallà
Nostru beatu camminu
Un face chè cummincià…

Tito

erbaghju · Bucugnanu & Marignana Nombre de messages: 2094 Date d'inscription: 10/10/2006

zifranu a écrit:

MALATARRA

Sò Gaià a turchina, sò u nulla è u tuttu
Sò l'arburu di vita, a radica è u fruttu
Tremu cù u to pientu, spartu a to prichera
Sò l'arechja chì sente è a voce chì spera

Sò u vadu chì corre è a petra chì stà
L'inguernu chì s'affacca è l'acellu chì và
U ventu frà e fronde, a matina fritosa
L'arte in ogni billezza, u sensu d'ogni cosa

Sò Gaià a turchina... Fideghja mi ssu mare
È ssi monti zuccati è sse fureste care !
Millenarii di vita, m'aghju francu e strage
Poi sè ghjuntu tù à rompe mi a pace

L'orizonte s'abbughja. L'aria si face piombu.
Da e cime affilate à u mo più prufondu
Corre a malatarra, corre l'anticu frombu
È l'antica paura ch'e' guarisca u mondu

Chì in fondu di mè, nimu a vole crede :
U MO CORE HÈ DI FARRU È DI PETRE D'INFERNU
È A MO STORIA HÈ VECHJA, INGHJUSTA È SENZA FEDE
PIÙ C'À A STORIA UMANA CHÌ SI CREDE L'ETERNU.

Zifranu

erbaghju · Bucugnanu & Marignana Nombre de messages: 2094 Date d'inscription: 10/10/2006

eiuSTeSSu a écrit:

Ogni ghjornu mi cunnettu
È vacu annant'à internettu,
Culà mi sentu putente,
Ùn ci sò mai pirdente.

Quandu sò un pulizzeru,
Quandu sò un tarruristu,
Possu fà lu minazzeru,
Ell' ùn m'hanu manc' avvistu.

Culà sò à u cummandu,
Culà le me truppe mandu,
Possu esse lu patrone
Di tutti è di u rughjone.

Facciu neciu d'esse quentu
È avanzu à lume spentu,
Facciu finta d'esse spertu,
Basta ch'ùn sia scupertu.

À le volte pari vana
Cara vita virtuale,
Forse sè ancu malsana
Ch'ùn sè cà un carnavale.

Eiustessu

erbaghju · Bucugnanu & Marignana Nombre de messages: 2094 Date d'inscription: 10/10/2006

Matteu Mattei a écrit:

Fintunome

Lasciami sunnià a to voce magia,
È offre u mio visu à u to dolce alenu,
Lascialumi basgià l’alabastrinu senu
Duve vogliu inciartà di u to core a via…

Annant’à a tastera pichju cun franasia
Quandu

1 nouveau message s’affissa à u mio screnu
Leghju i to filari, una stonda m’affrenu,
Mi pare di piglià a to manu una cria…

Passu nuttate in biancu nantu à a mio carreia
Chjinatu accantu à tè mi par d’esse, siccome
A to pelle di seta possi sfrisgià a meia.

È sentu chì per tè, di passione tremu
À parlatti d’amore soca saraghju scemu ?
Ùn cunnoscu di tè cà u to fintunome.

Matteu Mattei

erbaghju · Bucugnanu & Marignana Nombre de messages: 2094 Date d'inscription: 10/10/2006

titic a écrit:

Sognu di tè

Ora affaca l alba, bianca è silenziosa...
Aghju fattu un sognu duv'è tu c'eri tù..
Mi ferma di lu bughju sta stonda luminosa,
Quandu in li to bracci, aghju persu a virtù.

Hè vivu lu ricordu di lu to soffiu caldu..
Frà sognu è verita cì serà una leia ?
L 'averaghju suniatu u to sguardu smeraldu,
È la to pella croscia mischjata à la meia ?

Chimerica passione colma di verità,
Ora affacca l alba...mi devu discità,
È scanta, pè un ghjornu, u ricordu di tè.

Quand'ellu vulterà u beatu vesperu,
Spergu chì pianterà u meiu l ' addisperu,
È, chì le nostre mente seranu torna unite.

Titic

erbaghju · Bucugnanu & Marignana Nombre de messages: 2094 Date d'inscription: 10/10/2006

erbaghju a écrit:

Stanca a ghjurnata e so pitture appronta
Illuminendu lu celu marinu
Quandu à l'oriente u sole tramonta
Versi u mare argentu è turchinu

Di u pinnellu a seta hè pronta
Per culurisce u nulu andarinu
Chì balla pianu sopr'à a spilonca
È mette u lume annant'u so camminu

Stracciu di mele, di ramu è di malba
L'abrocu splende è risciumata hè l'alba
Quandu u bronzu si mischia cù l'oru

Ultimu fiatu d'un ghjornu chì more
À l'orizonte viaghja u russore
È di dumane digià m'innamoru

erbaghju

erbaghju · Bucugnanu & Marignana Nombre de messages: 2094 Date d'inscription: 10/10/2006

titic a écrit:

Berliner Mauer

Oghje face vint'anni ch'ellu si ne falatu,
Sott'à a mazzola ardita d'una revuluzione.
Ma quantu si sò morti senza avè lu francatu,
U muraglione negru simbulu d'oppressione ?

Mi vogliu ricurdà di la zitella orfagna,
Vitima d'un cunflitu ch'ell'ùn hà mai capitu.
Mi vogliu ricurda d'a donna chì si lagna,
Perchè, di l'astru latu, ferma lu so maritu.

Mi vogliu ricurdà di l'omu curagiosu,
C'hà vulsutu passa pè ritruvà la ziglia.
Mi vogliu ricurdà d'u vechju silenziosu,
Mortu solu, ..à trè passi di la cara famiglia.

Mi vogliu ricurdà di tutte l alme umane,
Ch'anu suffertu un ghjornu d'esse d'una nazione.
Vogliu, eiu, sperà è crede chì dumane,
Mai più ùn crescerà nisunu muraglione.

Titic

francesca

Stu foru ferma più chè mai u foru di i pueta !! salut

_________________
Tibè libaru
http://www.myspace.com/francescamar

erbaghju · Bucugnanu & Marignana Nombre de messages: 2094 Date d'inscription: 10/10/2006

titic a écrit:

U musichente

E so note, negre è bianche, sò stampate in la mio pella,
Ci nasce un' armunia chì mi porta à u celente,
Tandu, quassù, m'arriposu, arrimbata à una stella,
Ziculata da l'accordi d'un abile musichente.

A so musica magia s'ammaestra la mio vita,
È ne diventu la schiava d'una dolce meludia,
À piantà l'ore una stonda, a so ghitarra m'invita,
E so mane, cum'è fate, m'insegnanu la mio via.

Ùn e sentu altri soni chè quelli di lu so cantu,
Tuttu in giru si cunfonde, in un chjaru firmamentu.
U mio caru cuncertistu hà guaritu u mio turmentu.

Ne fermu quì, appaciata, cum'è in un locu santu,
A mo stanza hè cambiata in catedrale d'argentu,
Issa meludia, pura, hà stanciatu lu mio pientu.

Titic

erbaghju · Bucugnanu & Marignana Nombre de messages: 2094 Date d'inscription: 10/10/2006

Tito a écrit:

U curatu è u lupu

Un ghjornu per sta furesta
Spassighjava un curatu
D’un andatura unesta
E senza esse pressatu
Quandu chì di un buschettu
U lupu puntò a testa
U fiatu tagliatu nettu,
Quellu curatu s’arresta.

Subbitu vers’u Signore
Ne lampò una preghera
Cun in fronte stu sudore
Chì vi spieca a manera...
E tantu prestu chè pianu :
« O Signore, ti ne pregu
Fà ch’ellu sippii cristianu
Quellu lupu ch’eo vecu »

U fattu miraculosu
Hè chì u lupu si piantò
Pigliendu un versu seriosu
U lupu s’inghjinuchjò...
« O Signore, ti ne pregu
E ci mettu a passione
A stu ripastu ch’o vecu
Date a benedizzione. »

Tito

erbaghju · Bucugnanu & Marignana Nombre de messages: 2094 Date d'inscription: 10/10/2006

dirusiu a écrit:

E sponde di tavignanu

I to sguardi à pelle crude,
persi nù è mio speranze mute,
È i sonni di i mio passi,
Nù a Nucaria o pè i chjassi;

Ricordi di a Pozza à a Rena,
Duve trascingu a mio pena,
L’acqua dolce di a spiscia
È u ventu di a Sculiscia ;

Una sera cù Casanova,
Eramu inseme è Antone,
Disse à mè una nova,
Chi era eiu a to passione,

Ricordu di u mio rughju,
chì ferma sempre in carrughju,
s’hè tandu accesa una stella,
in fronte di a citadella,

So luntanu mà s’o ci pensu,
Sò l’odori, di’ssu celu immensu,
Caldane, rise è po ghjente,
Chì sempre schiaffanu a mio mente

I ricordi di una manu,
Chì accarezza à Tavignanu,
E l’ochji, di ‘ssa zitella,
in restonica à piatatella

Oghje un so più’ssu zitellu,
E mi ferma in core un rimorsu,
E quellu di ss’anni ghjuvelli,
Passati nantu à u corsu

So i ricordi di ‘ssa manu,
Chì mi stringhje in Tavignanu
È da San Pancraziu à Baliri,
I mio più belli suveniri

Dirusiu