Sarà per fà penitenza o per pacà u mio feu
À e mio muntagne care piene à cardi è tralasciate
À e nostre vechj’usanze oghje prestu abbandunate
Stamane vogliu attippà sine à Sant’Eliseu.

Cullendu per u Sartellu hè secca a so funtana
Ma ci si gode u frescu d’una fuiccia prufonda
È quella di u Caracutu mi disseta di a so onda
M’accunsente a so òra in ‘ssi tempi di calmana*

Sboccu, è vecu stu mondu cù l’ochji di i pastori
Chì anu vistu tanti strazii per ‘ssi ruvidi pentoni
È ci anu lasciatu un’arte scrittu à petre testimoni
È po’ tanta puesia chì si sente in ogni fiore

Ghjunt’à l’ùmile ghjesgiola accinta da a bassiccia
Chjodu l’ochji è rivecu : Ô tanta fede nustrale !
Ô tante prucissione per a festa patrunale
U vinti nove d’aostu. Oghje più nimu si spiccia…

Avale u sole ciotta daretu à Lattiniccia
È Cardu è Capizzolu mi parenu catedrale…

* u ritrattu è a puesia ùn sò stati fatti à a listess'epica, hè per quessa chì c'hè a neve...

A mi pinsava chè t'avia da riagisce tù u primu ! S'avessi cunnisciutu di più i lochi (è i nomi sopr'à tuttu) avaria circatu di fà la più bella...

bellissima puesia ! ùn cusnocu micca stu locu ma a to puesia mi dà u laziu d'andà quallà !

Bella o zifrà!

bella puesia

è u ritrattu dino'!

À ringrazià vi per tutti i vostri cumplimenti ! Ma inquant'à mè mi sò sbagliatu in qualchì locu : À mè mi si paria una puesia assai vicin'à u modu trad. postu chì fermanu ottunarii. U ritimu hè u listessu.